Kaiserschmarrn – ymerawdwr y crempogau!

Dwi wrth fy modd gyda chrempogau ond heblaw am ryw fore Sadwrn prin, anaml iawn dwi’n eu gwneud nhw. Ond bob dydd Mawrth Ynyd, dwi’n bwyta tomen enfawr ac addo fy mod i’n mynd i’w gwneud nhw’n fwy aml. Ond gesiwch be, dwi ddim!

A dim fi yw’r unig un, mae’r siopau yn llawn cynhwysion crempog (nai ddim dechrau pregethu am y crempogau na da chi’n eu cael mewn paced … Beth sydd yn haws na chymysgu llaeth blawd ac wyau?) yn yr wythnosau cyn dydd Mawrth Ynyd wedyn mae pawb yn anghofio am eu bodolaeth.

Ond pam? Mae yna gymaint y gallwch ei wneud â’r crempog syml, da chi mond angen mynd i creperie yn Ffrainc, neu i gael brecwast yn America i weld hynny. Ond, heb os nag oni bai, fy hoff bryd crempogaidd i yw Kaiserschamarrn. Dwn i’m faint ohonoch sydd wedi clywed am Kaiserschmarrn o’r blaen, heb son am ei fwyta, ond pwdin o Awstria ydio, ac mae o’r peth gorau y gallwch ei wneud gyda blawd, wyau a llaeth!

Ryw ddeng mlynedd yn ôl fe gefais i’r pleser o fyw yn Awstria, yn gweithio mewn gwesty dros y cyfnod sgïo, ac roeddwn i wrth fy modd gyda’r bwyd yno. Nawr dyw selsig a sauerkraut ddim y pethau mwyaf iach yn y byd, ond yn ystod y gaeaf does yna ddim byd gwell. Ond allan o’r holl fwyd kaiserschmarrn oedd fy ffefryn. Roeddwn i’n cael platied i ginio ar y mynydd o leiaf unwaith yr wythnos (peth gwych am Awstria, mae’n dderbyniol i gael pwdin fel cinio yno!).

Felly beth sydd mor arbennig am Kaiserchmarrn? Wel mae’r enw yn golygu llanast yr ymerawdwr, enw da! Ac mae o’n grempog melys, sy’n cael ei wneud trwy chwipio’r gwynnwy ar wahân, a’i blygu i mewn i’r cytew, fel eich bod chi’n creu rhyw fath o grempog souffle. Mae rhai llefydd yn ei goginio yn blaen , ond mae’n boblogaidd iawn gyda chyrens ynddo hefyd, a dyna’r un dwi’n ei hoffi.

Hanner ffordd trwy’r coginio mae’r crempog yn cael ei falu yn ddarnau. Yna mae’n cael ei weini gydag ychydig o siwgr eisin ar ei ben a phowlen o gompot ffrwythau. Mae’r compot ffrwythau fel arfer yn newid o un bwyty i’r llall, eirin sy’n draddodiadol ond dwi wedi cael compot afal neu fefus hefyd a hyd yn oed bowlen o eirin gwlanog tun! Heno fe ddefnyddiais i beth oedd gennyf yn y ty, sef mefus a llys duon bach (blueberry).

Dyma chi’r rysáit, a dwi’n addo does dim angen bod ar ben mynydd yn yr eira i fwynhau hwn, ond bysa fo’n neis!

Cynhwysion

5 wy
150g blawd plaen
250ml llaeth
2 llwy fwrdd siwgr
1 llwy de echdyniad fanila
Pinsied o halen
Rhesinau
Menyn i goginio

Dull

1. Cymysgwch y melynwy, blawd, siwgr, fanila, halen a llaeth nes bod gennych gytew tenau.

2. Chwisgiwch y gwynnwy nes ei fod yn stiff, a’i blygu yn ofalus i mewn i’r cytew gyda llwy fetel.

3. Toddwch y menyn mewn padell ffrio ac ychwanegwch y cytew. Gwasgarwch ychydig o resins am ei ben a’i ffrio ar dymheredd isel.

4. Trowch y crempog drosodd a’i adael i goginio am ryw funud, yna torrwch mewn i ddarnau bach gyda fforc, a’i ffrio nes ei fod wedi coginio yn llwyr.

5. Gweinwch gydag ychydig o siwgr eisin am ei ben a chompot ffrwythau ar yr ochr.

 

 

 

 

 

 

 

 

Tagiau: awstria, crempog, kaiserchmarrn, pwdin

Baked Alaska

Ddydd llun fe fyddai’n feirniad ar raglen Cog1nio, rhaglen debyg i junior masterchef. Fe fyddai’n gwneud masterclass efo’r plant ac wedyn yn beirniadu eu hymdrechion nhw.

Yr hyn fydd yn rhaid i’r plant ei goginio bydd baked Alaska. Bach o blast from the past ond rhywbeth fydd, gobeithio, yn herio’r plant.

Mae rhoi hufen ia mewn popty yn swnio yn hollol hurt, ond mae’r meringue yn gweithio fel ynysydd da. A gan mai dim ond am ychydig o funudau da chi’n rhoi’r pwdin yn y popty (jysd digon i setio’r meringue) dyw’r gwres ddim yn cyrraedd yr hufen ia.

Mae’n bosib gwneud un pwdin mawr ond fe wnes i rai bach unigol. Er doeddwn i dal methu gorffen un cyfan gan ei fod mor gyfoethog. Roedd o’n flasu iawn, mae’r meringue meddal un cyferbynnu yn hyfryd efo’r hufen ia oer, a’r sbwng ar y gwaelod yn rhoi ansawdd gwahanol. Ond wir maen nhw mor felys roeddwn i’n bownsio oddi ar y waliau! Felly os da chi isio sugar hit, triwch un o’r rhain.

 

Cynhwysion

Cacen sbwng (gwnewch un eich hun, neu prynwch un o’r siop)
Jam
Hufen ia (pa bynnag flas da chi eisiau)
3 gwyn wy
125g siwgr caster

 

Dull

1. Cynheswch y popty i 220C / 200C ffan.

 

2. Torrwch sleisen o’r gacen a thorri cylch allan (neu os da chi’n ddiog fel fi torrwch sgwâr, dio’n gwneud dim gwahaniaeth). Gosodwch y gacen ar hambwrdd pobi sydd wedi’i leinio gyda phapur gwrthsaim.

3. Taenwch ychydig o jam ar y gacen a gosod pelen o hufen ia am ei ben. Rhowch yn y rhewgell i’w gadw yn oer tan da chi wedi gwneud eich meringue.

4. Er mwyn gwneud y meringue gwahanwch y wyau a gosod y gwyn wy mewn bowlen fawr lân. Nawr mae’n bwysig bod y fowlen yn hollol lân heb unrhyw saim arni neu bydd y wyau ddim yn chwisgio yn iawn.

5. Chwisgwch y gwyn wy ar gyflymder isel i ddechrau, gan gynyddu’r cyflymder yn raddol. Unwaith da chi’n gallu gwneud copaon meddal gyda’r gwyn wy, gallwch ychwanegu’r siwgr. Gwnewch hyn un llwy fwrdd ar y tro, gam barhau i chwisgio nes bod eich wyau yn drwchus ac yn sgleiniog.

6. Nawr tynnwch eich sbwng a hufen ia o’r rhewgell a gorchuddiwch gyda’r meringue. Gwnewch yn siŵr nad oes yna unrhyw dyllau o gwbl, yn enwedig o gwmpas gwaelod y gwaelod.

7. Coginiwch yn y popty am ryw 4 munud, neu nes bod y meringue wedi dechrau brownio ar y tu allan. Gweinwch a bwytewch yn syth.

Hufen ia fanila ddefnyddiais i, ond defnyddiwch pa bynnag flas da chi’n licio. Hefyd os da chi’n licio siocled beth am roi cacen siocled neu brownie siocled ar y gwaelod a defnyddio hufen ia siocled. Hyfryd!

 

 

 

 

 

 

Tagiau: Baked Alaska, hufen ia, meringue, pwdin

Cacen gaws sinsir a riwbob

Fe welais i riwbob yn yr archfarchnad yn ddiweddar ac fe wnaeth i mi feddwl nad ydw i erioed wedi coginio unrhywbeth efo riwbob heblaw am grymbl. Felly fe ysgogodd hynny i mi fynd ati i chwilio am bwdin neu gacen fyddai ychydig bach yn fwy mentrus.

Mae riwbob a sinsir yn gyfuniad gwych, felly pan welais i rysait ar gyfer cacen gaws sinsir a riwbob, roedd rhaid yn rhaid i mi ei drio. Rysait ar gyfer cacen gaws wedi’i bobi yw hwn, rhywbeth nad oeddwn wedi’i wneud o’r blaen. Mae’n golygu ychydig bach mwy o waith ond mae’n rhaid dweud fy mod i’n ei hoffi’n well na chacen gaws cyffredin, gan ei fod yn llawer mwy ysgafn.

Roedd genni un broblem fawr pan ddaeth hi’n amser i mi goginio’r gacen gaws, doeddwn i methu ffeindio riwbob yn unrhyw le! Felly yn lle rhostio fy riwbob fy hun, bu raid i mi ddefnyddio riwbob tun. Nawr dwi’n gwybod mai cyfnewidiad gwael oedd hynny, ond roeddwn i wedi rhoi fy mryd ar wneud y gacen, felly dyna oedd yr unig opsiwn. Yr unig broblem efo hyn oedd bod y riwbob tun bach yn wlyb ac yn golygu bod y bisged ar y gwaelod yn mynd ychydig bach yn sogi. Ond roedd y riwbob yn gyferbyniad hyfryd i felyster y gacen ei hun. Fe fydd yn rhaid i mi drio’r rysait eto, unwaith dwi’n cael gafael ar riwbob ffres, i weld os fydd o’n gwneud gwahaniaeth.

Dwi wrth fy modd efo blas sinsir felly yn ogystal â defnyddio bisgedi sinsir fel gwaleod i’r gacen fe wnes i hefyd ychwanegu darnau o sinsir mewn syryp i’r gacen ei hun. Ond os nag ydych mor hoff â hynny o sinsir byddai modd ei adael allan o’r gacen ei hun, a chanolbwyntio ar y riwbob yn unig.

 

Cynhwysion

600g riwbob
75g siwgr caster

1 paced 300g o fisgedi sinsir
100g menyn heb halen wedi’i doddi
300g caws meddal llawn brasder
65g siwgr caster
Croen 1 lemon wedi’i gratio yn fân
3 wy mawr wedi’i gwahanu
150ml hufen wedi’i suro
2 ddarn o sinsir mewn syryp wedi’i torri yn fân

 

Dull

1. Torrwch y riwbob yn ddarnau tua 5cm o hyd a’u gosod mewn dysgl gall fynd yn y popty. Gwasgarwch y siwgr am eu pen a’u rhostio am 15 munud ar dymheredd o 200C / 180C fan. Neu os nag ydych yn gallu cael gafael ar riwbob ffres fel fi, defnyddiwch riwbob tun, neu riwbob wedi’i rewi.

2. Malwch y bisgedi, unai trwy eu rhoi mewn bag plastig a’u taro gyda phin rolio, neu rhowch nhw mewn prosesydd bwyd. Cymysgwch gyda’r menyn wedi toddi a’u gwasgu ar waelod tun crwm gydag ochrau sy’n dod yn rhydd. Gadewch i oeri yn yr oergell tra da chi’n gwneud gweddill y gacen gaws.

3. Curwch y caws meddal gyda chwisg electrig nes ei fod yn feddal, yna ychwanegwch y siwgr caster a chroen y lemon. Cymysgwch yn dda.

4. Ychwanegwch y 3 melynwy a’r hufen wedi’i suro a churo eto nes ei fod yn llyfn. Ychwanegwh y sinisr wedi’i dorri a chymysgu.

5, Mewn bowlen arall chwisgiwch y 3 gwyn wy nes ei fod yn stiff. Rhowch lond llwy o’r gwyn wy yn y gymysgedd gaws a’i gymysgu yn dda. Yna ychwanegwch weddill y gwyn wy a’i blygu yn ofalus, gan ddefnyddio llwy fetel.

6. Gwasgarwch y riwbob ar ben y bisgedi, yna tywalltwch y gymysgedd gacen gaws am ei ben.

7. Gosodwch ar hambwrdd pobi a’i goginio ar dymheredd o 180C/160C fan am 15 munud, neu nes ei fod wedi codi. Yna gostyngwch y tymheredd i 160C / 140C fan a’i bobi am 30-35 munud arall, nes ei fod yn teimlo’n eithaf solet ond dal ychydig yn wobli yn y canol.

8. Tynnwch allan o’r popty a rhedwch gyllell o gwmpas ochr y tun i ryddhau’r ochrau ychydig. Gadewch i oeri yn y tun. Peidiwch â phoeni os yw’r gacen gaws yn cracio ychydig, mae hyn yn eithaf naturiol. Dwi wedi clywed bod modd osgoi hyn trwy adael y gacen i oeri yn raddol yn y popty, ond roedd gennai bethau arall i’w coginio ar ôl hon, felly allan a hi a wfft ag unrhyw grac!

Tagiau: cacen, cacen gaws, pobi, riwbob, sinsir

Diwrnod Santes Dwynwen Hapus!

Diwrnod Santes Dwynwen Hapus i chi gyd!

Gobeithio bod pawb yn gwneud rhywbeth i ddathlu, neu’n defnyddiwch o fel esgus iwneud rhywbeth neis eich hunain! . Yn anffodus dwi’n gwneud dim gan bod y cariad yn Llundain a minnau yng Nghaerdydd, felly fyddai ddim yn cael mynd i Odette’s am swper i ddathlu eleni – roeddwn i’n hogan lwcus iawn y llynedd ac fe gawsom ni bryd o fwyd anhygoel yno.

Dwi erioed wedi bod yn ffan o Ddydd San Ffolant, mae o’n llawer rhy fasnachol a mae rhywun yn teimlo’r pwysau i wneud rhywbeth arbennig, ond rhywsut mae Dydd Santes Dwynwen yn teimlo’n wahanol. Dwi’n meddwl ei bod hi’n bwysig ein bod ni’n dathlu ein nawddsant cariadon ein hunain, mae stori Dwynwen yn hyfryd, ac wrth gwrs mae’n gwneud llawer mwy o synnwyr i gael dynes fel nawddsant y cariadon (sori hogia!) Felly mwynhewch heddiw ac os da chi’n chwilio am rywbeth i’w goginio i’r person arbennig yna yn eich bywyd, dwi wedi gwneud cacen red velevt ar eich cyfer.

Mae’n gacen berffaith gan ei bod y sbwng siocled yn lliw coch tywyll, a dwi’n addo na fydd unrhyw un yn gallu gwrthod sleisen o’r deisen hon!

O America daw’r gacen yn wreiddiol, ac mae wedi dod yn boblogaidd iawn fel cupcake yn y blynyddoedd diwethaf – a dweud y gwir rysait ar gyfer cupcakes yn llyfr yr hummingbird baker yw hwn. Dwi wedi addasu’r rysait rhywfaint gan fy mod i eisiau gwneud un gacen fawr, ac mewn tun calon wrth gwrs gan ei bod hi’n ddiwrnod Santes Dwynwen!

Cynhwysion

120g menyn heb halen ar dymheredd ystafell

300g siwgr caster

2 wy

40go bowdr coco

1 llwy de o fanila

240ml o laeth enwyn

300g blawd plaen

1 llwy de o bicarbonate of soda

3 llwy de o finegr gwyn

Ar gyfer yr eisin

600g siwgr o eisin

100g menyn heb halen ar dymheredd ystafell

300g caws meddal megis Philadelphia

Dull

1. Cynheswch y popty i 170°C / 150°C ffan. Irwch a leiniwch dun tua 20″ modfedd.

2. Gan ddefnyddio cymysgwr trydan, cymysgwch y menyn am 3 munud. Mae 3 munud yn lot hirach nag ydych chi’n ei feddwl felly amserwch o!

3. Nawr ychwanegwch y siwgr ychydig ar y tro, gan barhau i gymysgu. Yna cymysgwch am 4/5 munud arall. Dyma mae’r ryseitiau yn ei olygu pan maen nhw’n dweud ‘cream the butter and sugar until light and fluffy’!

4. Yna ychwanegwch yr wyau, un ar y tro, gan gymysgu yn llwyr rhwng pob un.

5. Mewn bowlen arall, cymysgwch y powdr coco, y fanila a tua llond llwy de o liw coch (past coch wnes i ei ddefnyddio, gewch chi byth liw cryf efo’r rhai rhad na da chi’n ei gael yn yr archfarchnad) ac ychydig bach o ddŵr nes eich bod chi’n cael past trwchus a thywyll.

6. Ychwanegwch at y menyn, a’i gymysgu yn dda.

7. Nawr ychwanegwch hanner y llaeth enwyn, ei gymysgu yn dda cyn ychwanegu hanner y blawd. Gwnewch yr un peth gyda gweddill y llaeth enwyn a’r blawd.

Os nad ydych chi’n gallu cael gafael ar laeth enwyn, mae’n bosib gwneud rhywbeth tebyg eich hunain gan ychwanegu sudd lemon at laeth cyffredin. Dyna wnes i y tro yma gan ddefnyddio sudd un lemwn ar gyfer 240ml o laeth)

8. Ychwanegwch y bicarbonate of soda a’r finegr a’i gymysgu unwaith eto.

9. Tywalltwch i mewn i’ch tun a phobwch am awr, nes bod sgiwer yn dod allan o’r canol yn lân.

10. Gadewch y gacen i oeri yn y tun am ychydig, cyn ei drosglwyddo i restl i oeri yn llwyr.

11. Ar ôl iddo oeri yn llwyr, torrwch y gacen yn ei hanner yn barod ar gyfer yr eisin.

12. Er mwyn gwneud yr eisin curwch y siwgr eisin a’r menyn tan ei fod wedi cymysgu yn dda, yna ychwanegwch y caws meddal oer i gyd, a’i guro am ryw 4-5 munud. Peidiwch â’i guro dim mwy na hynny neu fe fydd yn mynd yn rhy denau.

13. Rhowch ychydig o’r eisin rhwng dwy haen y gacen a gorchuddiwch y top a’r ochrau. Esmwythwch cymaint â phosib, wedyngadewch y gacen fel mae hi neu os oes gennych chi blentyn bach yn eich helpu chi (fel oedd gennyf i) gorchuddiwch y top gyda gormodedd o sprinkles pinc!

Tagiau: cacen, dwynwen, pobi, red velvet, santes, santes dwynwen, siocled

Rum Baba

Tan yr wythnos hon doeddwn i erioed wedi clywed am rum baba o’r blaen. Gofynnodd fy ffrind i mi wneud rhai iddo, ond wrth gwrs doedd genai ddim clem beth oedd un, heb sôn am sut i’w gwneud nhw. Felly dyma ddechrau twrio trwy fy llyfrau coginio am rysait.

Fe lwyddais i ganfod tri rysait ar eu cyfer ymysg fy llyfrau, ond roedd y tri yn edrych yn hollol wahanol. Felly fe benderfynais i ddilyn rysait Dan Lepard yn bennaf, ond gan gymryd ychydig o syniadau o’r ryseitiau eraill.

Rhyw fath o fara melys yw rum baba, sydd, ar ôl ei goginio, yn cael ei socian mewn syryp melys o rym, fanila a lemon. Pwdin a oedd, yn ôl y son, yn ffasiynol yn y 70au??? ac sydd yn dod yn wreiddiol o wlad Pwyl????

Ar un pwynt doeddwn i’m yn ffyddiog y byddai’r rysait yn gweithio. Bu raid mi gymysgu’r toes a llaw gan nad yw’r ktchenaid gyda fi yng Nghaerdydd ar hyn o bryd. Doedd hynny ddim yn ddelfrydol gan ei fod yn gymysgedd gludiog iawn. Dwi eisiau eu trio eto ond gyda’r peiriant, dwi’n siwr y bydd o’n llawer haws ac yn creu lot llai o lanast. Y broblem arall ges i oedd bod rhaid gadael i’r toes godi, fel bara. Ond gan ei bod hi mor oer ar hyn o bryd, fe gymerodd ddwywaith mor hir a’r disgwyl.

Gan nad oeddwn wedi bwyta na hyd yn oed gweld rum baba or blaen, doeddwn i ddim yn siwr sut yr oedden nhw fod i droi allan. Ond yn y diwedd fe gefais i fy siomi ar yr ochr orau, roedden nhw’n hyfryd. Mae yna flas tebyg iawn i brioche neu panattone ar y toes, ond mae’n nhw’n reit sych ar ben eu hunain. Dyna pam mae’r syryp rum yn hanfodol ac mae’n ychwanegu blas a cic i’r pwdin. Fe fyddai’n sicr yn eu gwneud nhw eto (ond dim ond os oes genai’r kitchenaid!)

Cynhwysion.

Dull

Tagiau: cacen, pobi, pwdin, rum, rum baba

Roulade siocled

Dwi’n gwybod na fues i’n blogio rhyw lawer dros y nadolig, ond dyw hynny ddim yn golygu na fues i’n coginio. A dweud y gwir fi oedd yn gyfrifol am wneud cinio dolig i’r teulu eleni, a hynny am y tro cyntaf. Wrth gwrs roedd rhaid gwneud pwdin arbennig, ond does yna’m llawer o bobl yn ein teulu ni sy’n licio pwdin dolig. Yn sicr dwi ddim! Mae’n llawer rhy gyfoethog a thrwm i fwyta ar ôl pryd mor fawr. Felly fe benderfynais wneud roulade siocled ar gyfer y dydd, llawer ysgafnach na phwdin nadolig, a pwy sydd ddim yn licio siocled?

Nawr dwi’n gwybod pawb di hen ddiflasu efo’r nadolig erbyn hyn, ond roeddwn i’n meddwl bod o’n werth rhannu’r rysait yma efo chi, gan fod roulade yn bwdin perffaith ar gyfer unrhyw achlysur.

A gan ei bod hi’n flwyddyn newydd, a rhai ohonom (gan gynnwys fi!) yn ceisio bwyta’n iach, mae modd gwneud y roulade yma yn weddol iachus. Hynny yw os ydych chi’n cyfnewid yr hufen dwbl am iogwrt neu creme fraiche braster isel. Hefyd does dim blawd ynddo, sy’n ei wneud yn ysgafn awn, ac yn gluten free. Felly beth sydd yna i beidio ei licio?

Mae yna filoedd o ryseitiau roualde i’w cael ond rysait gan Merry Berry yw hwn.

 

 

Cynhwysion

175g siocled tywyll, o leiaf 70% cocoa solids

6 wy, wedi eu gwahanu

175g siwgr caster

2 llwy fwrdd o bowdr cocoa

300ml hufen dwbl

Ychydig o ffrywthau fel mefus neu fafon

Dull

1. Cynheswch y popty I 180C/160 fan ac irwch dun swiss roll a’i leinio gyda papur gwrth saim.

2. Torrwch y siocled yn ddarnau man, a’i doddi mewn bowlen sydd wedi ei osod dros sosban o ddŵr sy’n mudferwi. (gwnewch yn siwr nad yw’r fowlen yn cyffwrdd y dŵr o gwbl)

3. Rhowch y 6 gwyn wy mewn bowlen a’i chwisgo tan ei fod yn stiff, ond gofalwch nad ydych chi’n ei or-wisgio. Dyle’ chi fod yn gallu dal y fowlen uwch eich pen heb iddo gwympo allan!

4. Rhowch y 6 melynwy mewn bowlen arall gyda’r siwgr a’i chwisgo am 2-3 munud nes ei fod yn edrych fel hufen trwchus.

5. Ar ôl i’r siocled oeri rhywfaint, ychwanegwch at y melynwy a’r siwgr, a’i blygu yn ofalus, nes ei fod wedi cymysgu yn llwyr.

6. Yna gan ddefnyddio llwy fetel mawr ychwanegwch ddau lond llwyaid o’r gwyn wy at y gymysgedd siocled. Mae hyn yn llacio’r gymysgedd ac yn ei gwneud hi’n haws i gymysgu gweddill y gwyn wy heb golli’r holl aer.

7. Ychwanegwch weddill y gwyn wy a’i blygu yn ofalus. Felly cymysgu yn ofalus mewn ffigwr wyth, yn hytrach na’i guro yn galed.

8. Hidlwch y powdr coco dros y cyfan a’i blygu yn ysgafn.

9. Tywalltwch y gymysgedd i mewn i’r tun, gan ei wthio yn ofalus i’r corneli.

10. Pobwch am 20-25 munud nes bod y gymysgedd wedi codi, a bod y top yn teimlo’n eithaf cadarn. Gadewch iddo oeri yn y tun (fe fydd y roulade yn disgyn rhywfaint wrth iddo oeri, ac efallai y bydd y top yn cracio rhywfaint).

11. Chwisgiwch yr hufen nes ei fod yn weddol stiff a pharatowch eich ffrwythau.

12. Gosodwch ddarn o bapur gwrthsaim ar eich bwrdd a thaenu ychydig o siwgr eisin ar ei ben. Gosodwch y roulade ar ei ben, fel bod y papur leinio yn eich wynebu. Yna, yn ofalus, tynnwch y papur i ffwrdd.

13. Taenwch yr hufen ar ben y roulade, gan adael gofod o 2cm yr holl ffordd o gwmpas yr ochr. Rhowch eich ffrwythau ar ben yr hufen.

14. Nawr mae’n amser rolio! Gydag un o’r ochrau byrraf yn eich wynebu chi, torrwch linell gyda chyllell finiog ryw 2cm o’r pen, gan sicrhau mai dim ond hanner ffordd trwy’r roulade yr ydych chi’n torri. Bydd hyn yn eich helpu chi i ddechrau rholio. Yna roliwch y darn yma drosodd yn ofalus, yna defnyddiwch y papur i’ch helpu chi i rolio gweddill y roulade yn dynn, trwy ei dynnu oddi wrthoch chi tra da chi’n rholio.

Peidiwch â phoeni os yw eich roulade yn cracio (fe wnaeth fy un i) mae’n eithaf cyffredin ac yn ychwanegu at edrychiad terfynol y pwdin.

Gweinwch gydag ychydig o siwgr eisin ar ei ben.

Tagiau: nadolig, pwdin, roulade, siocled

Blwyddyn Newydd Dda!

Helo a blwyddyn newydd dda i chi gyd.

Wel pwy feddylia ei bod hi bron yn flwyddyn ers i mi ddechrau’r blog yma. Pan grëais i’r blog, doeddwn i ddim yn disgwyl y busawn i’n blogio rhyw lawer. Ond dwi wedi cael cymaint o fwynhad, yr unig beth sy’n fy stopio rhag blogio mwy yw’r diffyg oriau yn y dydd. Mae wedi bod yn grêt cael esgus i drio ryseitiau newydd, ac i brynu hyd yn oed mwy o lyfrau coginio. Mae hefyd wedi bod yn bleser cael trafod cacennau a phobi gyda phobl eraill sy’n rhannu’r un diddordeb a minnau.

Dwi’n lwcus iawn bod y blog hefyd wedi arwain at nifer o cyfleoedd gwych, rhywbeth doeddwn i wir ddim yn ei ddisgwyl wrth ysgrifennu’r blog cyntaf yna fis Chwefror diwethaf. Roeddwn i ar raglen Blas, Radio Cymru eto heddiw, y tro yma yn trafod cacennau iach (ish!) ar gyfer unrhyw un sydd ar ddeiet yn y flwyddyn newydd. Mae’n raglen wych a dwi’n mwynhau cael cyfrannu.

Nawr mae’n rhaid i fi ymddiheuro bod y blog wedi bod yn dawel dros yr wythnosau diwethaf, yn anffodus mae gwyliau a gloddesta wedi tarfu ychydig ar yr amser blogio. Ond un o fy addunedau flwyddyn newydd yw i gario ymlaen i flogio cymaint â phosib. Bydd hynny, yn amlwg, yn golygu lot o bobi ym mis Ionawr, sydd yn anffodus yn achosi problem i un o fy addunedau eraill, o fwyta yn fwy iach. O wel, dwi wedi dweud na fyddai’n yfed ym mis Ionawr chwaith, ond mae’n rhaid i fi gael rhyw bleser yn does!

O ran fy addunedau coginio, dwi’n gobeithio palu trwy’r holl lyfrau coginio yna sydd gennyf, a pharhau i drio ryseitiau newydd. Ond dwi hefyd yn gobeithio cael ychydig mwy o amser i bobi bara, rhywbeth dwi’n awyddus iawn i’w feistrioli. Mae gennyf gacen briodas arall i’w wneud eleni hefyd, y tro yma yn yr Alpau yn Ffrainc, a da chi’n sicr o glywed sut y byddai’n dygymod a hynny!

Felly dwi’n gobeithio eich bod chi’n mwynhau darllen y blog cymaint â dwi’n mwynhau ei sgwennu. Ac os oes gennych chi awgrymiadau am bethau i goginio, neu ryseitiau yr hoffech chi weld ar y blog, gadewch i mi wybod.

Bwyta yn Efrog Newydd

Wel Nadolig Llawen a Blwyddyn Newydd Dda i chi gyd. Ymddiheuriadau am y diffyg blogio dros yr ŵyl ond dwi wedi bod yn brysur yn bwyta, yfed, diogi a dal fyny efo’r teulu (beth arall sy’ na i’w wneud dros y gwyliau?). Ond y penwythnos cyn y Nadolig fe fues i ar drip bach i Efrog Newydd gyda’r cariad.

Roedd y ddau ohonom wedi bod o’r blaen, felly doedd yna ddim pwysau i weld y golygfeydd. Felly’r bwriad oedd gwneud bach o siopa dolig (ok lot o siopa!) a chrwydro o gwmpas y ddinas yn bwyta ac yfed – beth well?

Felly dyma rai o’r danteithion y buem ni’n ei fwyta ar ein hymweliad i Efrog Newydd.

Dyma’r pryd cynaf i mi ei gael, ac am bryd da i ddechrau. Pulled pork sandwich mewn bynsen brioche efo coleslaw a thomen o chips wrth gwrs.

Roedd y bwyd yn Efrog Newydd yn atyniad mawr i mi, felly cyn mynd fe wnes i fwcio taith fwyd o gwmpas Greenwich Village gyda Foods of New York Tours. Roeddwn i’n gobeithio y byddai’n rhoi blas i ni o’r bwyd gorau sydd gan y ddinas i’w gynnig. Ac mae’n rhaid dweud dyma oedd un o uchafbwyntiau’r gwyliau i mi. Roedd o’n para am 3 awr ac fe aethom i naw o wahanol lefydd i flasu eu bwydydd. Ar ben y bwyd blasus roeddem ni hefyd yn clywed am gefndir y bwytai a’r siopau, a hanes yr ardal yn gyffredinol. Profiad gwerth chweil os ydych chi’n ymweld ag Efrog Newydd ac yn licio eich bwyd.

This slideshow requires JavaScript.

Y lle cyntaf i ni fynd iddo oedd Joe’s pizza, i gael New York pizza clasurol, tenau a crispy, perffaith am 11 y bore!

Wedi hynny fe flasom ni olew yn O&Co, rhywbeth o’r enw choripain (chorizo ar fara) ym mwyty Little Havana, y clasur Americanaidd Mac and cheese yn yr House Garden a risotto ball yn Ficcos.

Wedyn roedd hi’n amser i eistedd lawr a chael diod bach yn Centro Vinoteca, bwyty Eidalaidd hyfryd. A gan ein bod ni ar ein gwyliau roedd rhaid cael coctel, felly fe gawsom ni bellini yr un. I gyd fynd â’r diodydd fe gawsom ni piccolini, 4 canapés bach. Sef truffled deviled egg, datysen wedi’i lapio mewn cig moch a’i stwffio gyda gorgonzola, courgette fritter ac artichoke a chaws.

Ar ôl dro bach o gwmpas yr ardal roedd hi’n amser am bwdin, sef chocolate chip cookies o Milk & Cookies. Roedden nhw’n dal yn gynnes o’r popty ac yn hynod o flasus.

Ar ôl hynny fe aethom i Murray’s Cheese i flasu ychydig o gawsiau gwahanol, cyn gorffen gyda cannoli yn Rocco’s. Erbyn hynny roeddwn i bron a byrstio, ond wedi cael amser gwych.

Y bore wedyn, ar ôl gormod o goctels y noson cynt, roedd angen brecwast awr arnom. Felly fe wnaethom ni ganfod diner gwych ar Union Square. Ble gefais i Huevos Rancheros anhygoel a Johny wy, chorizo spinach a thatws, gyda sudd oren mawr ac wrth gwrs y ‘bottomless cup of coffee’!

 

Ar ein noson olaf fe aethom am bryd yn y Standard Grill yn y Meatpacking district, ble gefais i’r lamb shank mwyaf dwi erioed wedi ei weld a Johny porc chop anferthol. Mawr ond blasus!

Mae’r bwyd stryd yn grêt yn New York hefyd, yn enwedig yn y marchnadoedd Nadolig sydd ymhobman yr adeg yma o’r Nadolig. Mae’n rhaid cael hot dog a pretzel os ydych chi’n ymweld â’r ddinas.

Ac un pryd bach (oes na ffasiwn beth a bach yn America?) yn y maes awyr cyn rolio ymlaen ar yr awyren!

Addurno’r gacen Nadolig

Dwi’n tueddu i aros tan yr wythnos cyn y Nadolig i addurno fy nghacennau Nadolig (er mwyn rhoi digon o amser i fi eu bwydo gyda brandi!). Ond heno fydd y tro olaf i mi weld mam a thad y cariad cyn y Nadolig, felly roedd rhaid gorffen eu cacen nhw mewn amser.

Mae’r addurn ar y cacennau yn mynd yn fwy uchelgeisiol bob blwyddyn. Pan ddechreuais i wneud cacennau Nadolig roeddwn i’n ddigon hapus i osod ryw Siôn Corn plastig ar y top a rhuban rown yr ochr. Ond erbyn hyn dwi’n licio gwneud yr addurniadau fy hun.

Ac eleni mae yna thema frozen planet i’r gacen. A dweud y gwir weles i lun o gacen gyda phengwiniaid arni ryw fis yn ôl a meddwl bysa fo’n syniad gwych ar gyfer fy nghacennau i. Pwy sydd ddim yn licio pengwiniaid?

Felly sut mae mynd ati i addurno eich cacen Nadolig? Wel y peth cyntaf i’w wneud yw paratoi’r gacen gan dorri’r top i ffwrdd er mwyn ei wneud yn hollol fflat. Yna roliwch allan ddigon o farsipán i orchuddio’r gacen gyfan. Er mwyn helpu’r marsipán i sticio i’r gacen mae angen brwsio’r gacen gyda jam bricyll wedi’i ei doddi. Yna gallwch osod y marsipán ar ei ben gan esmwytho’r top i ddechrau a gweithio eich ffordd i lawr yr ochrau.

Yna cyn i chi roi’r eisin ar y top mae angen gadael y marsipán i sychu rhywfaint, dwi’n tueddu i’w adael dros nos o leiaf.

Dwi’n defnyddio eisin ffondant i orchuddio fy nghacennau ond dwi wedi defnyddio royal icing yn y gorffennol hefyd, sy’n edrych yn dda hefyd. Mae’n gallu bod yn llawer haws i’w ddefnyddio nag eisin ffondant, does dim angen bod cweit mor daclus, ac mae modd ei sbeicio i fyny i edrych fel eira, sy’n neis.

Ond os ydych chi’n defnyddio eisin ffondant roliwch ddarn allan sy’n ddigon mawr i orchuddio eich cacen. Brwsiwch ychydig bach o ddŵr ar ben y marsipán i helpu’r eisin i lynu wrtho. Yna gosodwch ar ben y marsipán a’i esmwytho ar y top i ddechrau ac yna lawr yr ochrau. Torrwch unrhyw eisin ychwanegol o gwmpas y gwaelod,a dyna ni.

Wedyn mae rhydd hynt i chi wneud beth bynnag da chi eisiau i addurno eich cacen. Fe ddefnyddiais i eisin du i wneud y pengwiniaid, gan dorri stribyn o eisin gwyn i’r frest a darn bach o eisin melyn fel pig. Wedyn fe wnes i beipio smotiau bach o royal icing ar hyd top y gacen i edrych fel eira a’i orchuddio gyda glitter gwyn, sy’n disgleirio fel rhew (mae’n ddolig mae angen glitter!).

Tagiau: addurno, cacen, nadolig, pobi

Mins Peis Cartref

Fe gefais i ddiwrnod prin iawn i fi fy hun ddoe, felly wrth gwrs fe wnes i ei dreulio’r diwrnod cyfan yn y gegin. Dwi’n mynd ar fy ngwyliau i New York yr wythnos nesaf,(gewch chi’r hanes ar y blog pan dwi’n dod ‘nôl) felly dyma oedd fy unig gyfle i wneud ychydig bach o bobi Nadoligaidd.

Y peth cyntaf yr oeddwn eisiau ei wneud oedd mins peis, ond hefyd roeddwn i eisiau trio gwneud stollen am y tro cyntaf, gan ei fod yn un o fy hoff fwydydd Nadoligaidd. Y llynedd fe wnes i fy saws cranberry fy hun a siytni nionod coch, ac roedd y ddau mor boblogaidd gyda’r teulu’r llynedd, fel fy mod i wedi cael galwadau i wneud mwy eleni. Heddiw mae’n rhaid i mi fwrw ymlaen gydag addurno fy nghacennau Nadolig, ond yn gyntaf dwi am rannu fy rysait am fins peis gyda chi.

Goeliwch chi byth ond fel plentyn roeddwn i’n casau mins peis. Dwi wastad wedi bod wrth fy modd efo cacen Nadolig ond am ryw reswm doeddwn i ddim yn licio mins peis. ond mae hynny wedi hen newid, ac er bod mins pes o’r siop yn ddigon neis does dim i guro un cartref.

Mae lot o bobl yn defnyddio pastry plaen gyda’u mins peis ond dwi’n licio defnyddio pastry melys. Mae’n ddolig felly mae’n rhaid i bopeth fod mor gyfoethog a blasus a phosib!

Er fy mod i’n gwneud fy mhastry fy hun dwi erioed wedi gwneud fy mincemeat fy hun, mae amser yn rhy brin ar hyn o bryd! Ond wrth gwrs dwi yn licio ychwanegu rhywbeth at y mincmeat dwi’n ei brynu o’r siop. Dwi’n tueddu i brynu’r un gorau posib ac wedyn yn ychwanegu zest oren wedi’i gratio a sblash go dda o frandi (mae’n rheol bod rhaid rhoi alcohol ym mhopeth da chi’n ei goginio dros y Nadolig)

Pan da chi’n gwneud y pastry mae’n bwysig eich bod chi’n cadw popeth mor oer â phosib, felly cadwch eich cynhwysion a hyd yn oed eich bowlen yn yr oergell a throwch y gwres canolog yn eich cegin i ffwrdd am ychydig neu agorwch ffenest!

Cynhwysion

250g blawd plaen

50g siwgr eisin

75g almonau mâl

pinsied o halen

150g menyn heb halen

2 felynwy

2 llwy fwrdd o sudd oren ffres oer

Dull

1. Hidlwch y blawd, siwgr eisin a halen mewn i fowlen ac ychwanegwch yr almonau mâl.

2. Torrwch y menyn mewn i ddarnau bach a’i rwbio fewn i’r blawd, nes ei fod yn edrych fel tywod. Neu os oes gennych chi brosesydd bwyd, cymysgwch bopeth at ei gilydd yn hwnna.

3. Cymysgwch y melynwy gyda’r sudd oren a’i ychwanegu ar y blawd a menyn.

4. Cymysgwch at ei gilydd nes ei fod yn ffurfio toes, mae’n haws defnyddio eich dwylo i wneud hyn.

5. lapiwch y toes mewn cling film a’i roi yn yr oergell i oeri am o leiaf 30 munud.

6. Ar ôl 30 munud rholiwch hanner y toes allan ar fwrdd gydag ychydig o flawd arno. Dwi’n licio pastry tenau, felly dwi’n rholio fo allan nes ei fod yn ryw 2mm o drwch. Yna torrwch gylch allan, a’i osod mewn tun wedi ei iro gyda menyn.

7. Yna roliwch weddill y toes a thorri cylchoedd ychydig bach yn llai mewn maint i ffitio ar y top.

8. Lenwch y cesys pastry gyda mincemeat a gosodwch y caead ar ei ben, gan ddefnyddio ychydig o laeth o amgylch yr ochr i’w ludo. Dwi wedyn yn defnyddio fforc i grimpio’r ochrau ac yn torri twll yn y top i adael y stem allan.

9. Gorffennwch drwy eu brwsio gyda llaeth a rhowch ychydig bach o siwgr ar y top

10. Pobwch ar dymheredd o 180ºC / 160ºC fan am 25-30 munud.

Mae’n bosib rhewi rhain ar ôl eu coginio, felly gwnewch ddwywaith gymaint a da chi eisiau, ac fe fydd gennych chi ddigon i bara tan ddiwrnod dolig.

Tagiau: mins peis, nadolig, pastry, pobi