Archif | pwdin RSS feed for this section

Pwdin Chia

21 Meh

pwdin chia 3

O ddarllen y blog yma fe fuasai’n ddigon teg petae chi’n meddwl mai’r unig beth dwi’n ei fwyta yw cacennau.

Dwi’n addo nad yw hynny yn wir. A dweud y gwir,  dwi’n licio meddwl fy mod i’n bwyta’n iach y rhan helaeth o’r amser – dwi’n bwyta lot o ffrwythau, llysiau a physgod – ac yn trio osgoi gormod of fraster a siwgr.

Ond wrth gwrs popeth ‘in moderation’ ys dywed y Sais.

Felly ar benwythnos mi ydw i’n mwynhau darn o gacen, bisgedi neu darten heb deimlo’n euog. A bryd hynny dwi ddim yn poeni iot faint o fraster neu siwgr sydd ynddo!

Nawr dwi’n ddigon hapus yn bwyta salad drwy’r wythnos, yn enwedig pan mae’r tywydd fel hyn, ond dwi wastad yn teimlo’r angen am rywbeth melys ar ôl pryd. Yn aml bydd ffrwyth yn gwneud y tro, ond weiniau dwi eisiau rhywbeth sy’n teimlo ychydig bach yn fwy fel pwdin, rhywbeth mwy boddhaol, ond eto ydd ddim yn mynd i fynd yn syth ar fy mol.

Wel dwi wedi darganfod y pwdin iach perffaith. Mae’n falsus ac mae’n cael ei wneud â hadau chia, y ‘superfood’ diweddaraf.

pwdin chia5

Daw hadau chia yn wreiddiol o Fecsico ac roedden nhw’n elfen hanfodol o ddiet yr Astec a’r Mayan. Mae’n debyg bod yr Astecs yn talu eu trethi gyda’r hadau yma, a bod dwy lwy fwrdd yn ddigon i gadw milwyr i fynd am 24 awr. Ac mae’n hawdd gweld pam, mae’r hadau bach yn llawn ffibr, omega-3, calsiwm, protein – lot o bethau da.

Maen nhw’n ddarganfyddiad weddol newydd i mi, ond ers i mi eu prynu o’r siop bwyd iach lleol dwi wedi gwneud defnydd helaeth ohonyn nhw, gan eu hychwanegu at iogwrt, at uwd a hyd yn oed eu hysgeintio dros salad.

pwdin chia7

pwdin chia2

Er mwyn gwneud y pwdin yma dwi’n eu cymysgu gydag iogwrt plaen braster isel a’u gadael am o leiaf hanner awr, neu’n well fyth dros nos, hyd nes bod yr hadau bach yn amsugno rhywfaint o’r hylif ac yn chwyddo ac yn troi’n feddal. Yna dwi’n ychwanegu ychydig o riwbob wedi’i stiwio, neu fafon ffres a banana.

 

Mae’n bwdin syml, ond blasus, gyda’r hadau chia yn rhoi ychydig mwy o sylwedd i’r pwdin.

Cynhwysion

3 llwy fwrdd o iogwrt plaen braster isel
1 llwy de o hadau chia
2 lwy fwrdd o riwbob wedi’i stiwio (wedi’i wneud heb ormod o siwgr)
Neu 6 mafon a hanner banana.

Dull

Rhowch yr iogwrt a’r hadau mewn powlen a’i gymysgu, gorchuddio hi gyda cling film neu rhowch gaead am ei ben a rhowch yn yr oergell am o leiaf hanner awr, neu mwy o amser os oes gennych chi.

Yna cymysgwch y riwbob i mewn, neu os ydw i’n defnyddio ffrwythau ffres, stwnsiwch nhw rywfaint, cyn eu cymysgu at y pwdin.

Topfenpalatschinken – crempogau wedi’i pobi

4 Maw

20140303-204501.jpg

Does gen i ddim bwriad i ymprydio dros y Grawys, a dweud y gwir dwi ddim yn mynd i ymwrthod rhag unrhyw beth (mae bywyd yn rhy fyr). Ond dyw hynny ddim yn mynd i fy stopio rhag defnyddio’r holl flawd, siwgr wyau, llaeth a menyn yn y tŷ a dathlu Dydd Mawrth Ynyd, neu fel da ni gyd yn licio galw’r diwrnod arbennig hwn – Diwrnod Crempog.

Dwi wrth fy modd gyda’r hen glasur – crempog gyda siwgr a lemon am ei ben, ond weithiau mae angen ehangu ein gorwelion. Ac os ydych awydd gwneud rhywbeth ychydig yn wahanol gyda’ch crempogau eleni yna ewch chi ddim o’i le o edrych tuag Awstria. Mae’r Awstriaid yn bwyta crempogau drwy gydol y flwyddyn, boed o’n bwdin (dwi di blogio am fy hoffter o Kaiserschmarrn o’r blaen) ond hefyd i ginio – mae nhw’n gwneud cawl clir hyfryd, gyda stribedi o grempog ynddo.

20140303-204527.jpg

Ond eleni dwi am wneud Topfenpalatschinken – pwdin eithaf newydd i mi, ond un traddodiadol iawn yn Awstria. Mae crempogau’n cael eu llenwi gyda chymysgedd melys o gaws meddal, lemon a rhesin; ac yna’n cael eu pobi mewn cwstard. Wir i chi mae’n ogoneddus, ac yn berffaith os ydych chi’n chwilio am esgus i ddefnyddio’r holl fraster a siwgr yn y tŷ cyn y Grawys (neu jyst yn farus fel fi!). Y caws meddal Quark maen nhw’n ei ddefnyddio yn Awstria, dyw o ddim wastad yn hawdd i’w ffeindio yn y wlad hon, felly mae’n bosib defnyddio caws mascarpone neu gaws meddal fel Philadelphia yn ei le.

Cynhwysion

Ar gyfer y Crempogau

100g o flawd plaen

Pinsied o halen

2 wy

250ml o laeth

25g o fenyn wedi toddi

Ar gyfer y llenwad

40g o resins

1 llwy fwrdd o frandi

250g o Quark

1 wy

1 llwy fwrdd o groen lemon wedi gratio

3 llwy fwrdd o siwgr fanila

Ar gyfer y cwstard

125ml o laeth

1 wy

1 llwy fwrdd o siwgr

Dull

  1. Gwnewch y crempogau i ddechrau. Hidlwch y blawd mewn powlen ac ychwanegu’r halen.
  2. Cymysgwch yr wyau mewn cwpan. Gwnewch bant ynghanol y blawd a thywallt yr wyau i mewn.
  3. Yn raddol ychwanegwch y llaeth gan gymysgu gyda chwisg llaw. Cymysgwch yn araf o’r canol gan gymysgu’r blawd o’r ochrau’n raddol. Dylai hyn sicrhau na fydd lympiau yn y gymysgedd.
  4. Ar ôl ychwanegu’r llaeth i gyd, gadewch y cytew yn yr oergell i orffwys am ryw hanner awr.
  5. Pan fyddwch chi’n barod i goginio’r crempogau toddwch y menyn mewn padell ffrio ac ychwanegu dau lond llwy fwrdd i’r cytew a chymysgu’n dda.
  6. Tywalltwch y gweddill allan o’r badell a’i roi i un ochr. Defnyddiwch bapur cegin i gael gwared ar unrhyw fenyn sydd dros ben yn y badell er mwyn sicrhau nad ydych yn boddi eich crempog mewn menyn.
  7. Yna, gyda’r gwres i fyny’n uchel, rhowch ddigon o gytew yn y badell i orchuddio’r gwaelod, gan droi’r badell o gwmpas i wneud yn siŵr bod y cytew’n ei orchuddio’n hafal. Gofalwch beidio â rhoi gormod o gytew yn y badell, fe ddylai’r crempogau fod yn eithaf tenau.
  8. Ar ôl rhyw funud neu ddwy, fe ddylech weld swigod bach ar y grempog. Trowch y grempog drosodd a’u coginio am funud neu ddwy arall.
  9. Cynheswch y popty i 180°C / Ffan 160°C / Nwy 4 ac irwch ddysgl sy’n addas i’r popty gyda menyn.
  10. Rhowch y rhesins i socian yn y brandi.
  11. Rhowch y Quark, yr wy, y croen lemon a’r siwgr mewn powlen a’u cymysgu gyda llwy bren neu chwisg llaw. Ychwanegwch y rhesins a chymysgu.
  12. Mewn powlen arall cymysgwch y llaeth, yr wy a’r siwgr a chymysgu’n dda gyda chwisg.
  13. Taenwch ychydig o’r gymysgedd Quark ar un o’r crempogau, ei rolio i fyny a’i osod yn y ddysgl. Ailadroddwch gyda gweddill y crempogau a’r llenwad nes bod y ddysgl yn llawn.
  14. Tywalltwch y cwstard am ben y crempogau a choginio am 15–20 munud nes bod y cwstard wedi coginio a’r top wedi brownio.

Bwytewch yn gynnes.

Hufen iâ crymbl riwbob

13 Gor

hufen ia crymbl riwbobDwi’n caru riwbob, mae’n un o fy hoff ffrwythau ( ok dwi’n gwybod mai llysieuyn ydio, ond tydio ddim yn swnio’n iawn), felly pan ges i gynnig llond bag mawr o riwbob o ardd y rhieni yng nghyfraith, roeddwn i wrth fy modd.

Roedd yna gymaint o bethau y gallwn i fod wedi’i gwneud efo nhw, ond gan fy mod i hefyd wedi cael benthyg peiriant hufen ia fy mam yng nghyfraith, roeddwn i’n awyddus i geisio gwneud rhyw fath o hufen iâ. Roeddwn i’n gwybod y byddai’r riwbob sawrus yn cyferbynnu yn berffaith gyda’r hufen melys, wel da ni gyd yn gwybod pa mor dda ydi riwbob a chwstard. Ond dwi’n licio ychydig mwy o ansawdd yn fy hufen iâ, felly dyna ble daeth y syniad o ychwanegu crymbl iddo.

hufen ia crymbl riwbob 2

 

hufen ia crymbl riwbob 3

Dwi’m yn licio canmol fy hun  (ok mi ydw i weithiau!) ond dyma’r hufen iâ gorau i mi ei wneud, ac yn agos iawn i fod fy hoff flas erioed – wel heblaw am yr un afal yn Odettes, mae hwnna yn anhygoel!

 

Cynhwysion

400g riwbob

150g siwgr mân

1 llwy fwrdd o sudd lemon

80g blawd plaen

50g menyn

40g siwgr brown meddal

40g ceirch

4 melynwy

300ml hufen dwbl

450ml llaeth

150g siwgr mân

½ pod fanila

 

Dull

Dechreuwch drwy goginio’r riwbob a’r crymbl, gan fod angen gadael iddyn nhw oeri cyn gwneud yr hufen ia.

Cynheswch y popty i 210°C / 190°C ffan

Rhowch y riwbob, sudd lemon a siwgr mewn dysgl sy’n iawn i fynd yn y popty, a’u coginio am 30 munud.

Yn y cyfamser gwnewch y crymbl drwy rwbio’r menyn i mewn i’r blawd gyda’ch bysedd, nes ei fod yn edrych fel briwsion. Yna ychwanegwch y siwgr a’r ceirch a’i gymysgu.

Taenwch ar dun pobi, a’i goginio yn yr un popty am 10 munud, gan ei droi hanner ffordd trwy’r amser coginio.

Gadewch y crymbl i oeri yn llwyr, ond ar ôl gadael i’r riwbob oeri rhywfaint, rhowch mewn prosesydd bwyd neu blender nes ei fod yn llyfn. Rhowch yn yr oergell i oeri yn llwyr.

Er mwyn gwneud yr hufen ia curwch y siwgr a’r melynwy mewn powlen a thynnwch yr hadau o’r pod fanila a’u hychwanegu at y siwgr ar wyau.

Mewn sosban, cynheswch y llaeth , gyda’r pod fanila sydd ar ôl, nes ei fod jyst yn dechrau codi berw.

Tynnwch y pod fanila allan a thywallt y llaeth cynnes dros y wyau a’r siwgr, gan ei chwisgio yr holl amser.

Trosglwyddwch yr holl gymysgedd yn ôl i mewn i’r sosban, a’i gynhesu eto, gan ei droi gyda llwy bren yr holl amser, nes ei fod yn tewychu. Dylai fod yn ddigon trwchus i orchuddio cefn eich llwy, ond gwnewch yn siŵr nad ydio’n berwi o gwbl.

Tynnwch oddi ar y gwres a’i roi yn ôl mewn powlen, gyda haen o cling ffilm reit ar wyneb y cwstard (er mwyn osgoi ffurfio croen), a’i adael i oeri.

Unwaith y bydd popeth wedi oeri, ychwanegwch yr hufen at y cwstard a’i gymysgu yn dda, yna ychwanegwch y riwbob a’i gymysgu.

Rhowch yn eich peiriant hufen iâ, a pan fydd o’n dechrau mynd yn drwchus ac yn rhewi, ychwanegwch eich crymbl.

Pan fydd wedi rhewi digon rhowch mewn bocs plastig a’i gadw yn y rhewgell.

Os nad oes gennych chi beiriant hufen ia, rhowch yr hufen ia yn syth mewn bocs plastig a’i rewi am ddwy awr, yna tynnwch allan a’i gymysgu yn dda gyda chwisg neu fforc. Ailadroddwch bob rhyw awr, a pan fydd o’n ddigon trwchus gallwch ychwanegu’r crymbl.

Dyw o ddim yn gwneud hufen iâ cweit mor dda â pheiriant ac efallai y bydd yn rhaid ei adael i ddadmer ychydig cyn gweini, ond fe fydd yn dal i flasu’n hyfryd. Os ydych yn gwenud hufen ia fel hyn, weithiau mae’n helpu i roi sloch o alcohol ynddo, gan ei fod yn golygu na fydd yn rhewi mor galed, mae vodka yn dda, gan nad oes blas iddo.

 

hufen ia crymbl riwbob 4

Ceuled Lemon a Meringues

6 Gor

20130705-194828.jpg

Gyda’r haul yn tywynnu o’r diwedd, fe ges i fy ngwahodd i farbeciw yn nhŷ ffrind. Roedd hi wedi gofyn i ni gyd ddod a rhywfaint o gig a diod gyda ni, ond wrth gwrs doeddwn i ddim yn teimlo fy mod i’n gallu troi fyny heb bwdin (dyna di’r broblem y dyddiau yma!). Felly’r cwestiwn mawr oedd beth i’w wneud yn bwdin ar gyfer barbeciw, pan fo rhaid teithio ar draws Llundain ar y tube?

Doeddwn i methu gwneud hufen ia, gan y byddai wedi toddi erbyn i mi gyrraedd, doeddwn i hefyd methu gwneud cacen neu darten neis gan fy mod i ar faglau ac yn gorfod stwffio popeth mewn rycsac. Y peth cyntaf ddaeth i fy meddwl oedd meringue, gan ei fod yn ysgafn a doedd dim ots mawr os oedd o’n malu rhywfaint yn fy mag.

meringues

Felly fe es ati i wneud nifer meringues bach, fel bod pawb yn cael un yr un. Y bwriad wedyn oedd mynd a hufen efo fi, a’i chwisgio yno, a’i weini efo ychydig o ffrwythau. Ond wrth gwrs ar ôl gwneud y meringues roedd gen i lot o felyn wy yn sbâr, a dwi ddim yn licio taflu dim. Felly ar ôl edrych ar beth oedd gen i yn y cypyrddau (rhyw foment ready steady cook bach!), fe ges i brên wêf o wneud ceuled lemon (neu lemon curd i’r rhan fwyaf ohonom). Fe fyddai’r ceuled lemon yn mynd yn berffaith gyda’r meringue melys a’r hufen.

Efallai bod ceuled lemon yn swnio’n strach i’w wneud, ond mewn gwirionedd mae’n hawdd iawn, ac yn reit sydyn hefyd. Fe wnes ei wneud fore’r barbeciw, gyda digon o amser iddo oeri.

meringue a lemon curd

Wrth gwrs does dim rhaid ei ddefnyddio fel ag y gwnes i, mae’n hyfryd ar dost neu crumpet, neu ynghanol sbwng Victoria.

Ceuled lemon

Cynhwysion

3 lemon (sudd a chroen)

150g siwgr mân

4 melyn wy, 1 wy cyfan

100g menyn heb halen

Dull

1. Rhowch y siwgr, sudd lemon, creon lemon wedi’i gratio’r wyau mewn powlen wnaiff ffitio dros sosban.

2. Rhowch fodfedd o ddŵr yn eich sosban i fudferwi a gosod y bowlen am ei ben, gan sicrhau nad yw’r gwaelod yn cyffwrdd y dŵr.

3. Cymysgwch gyda chwisg llaw, nes ei fod wedi cyfuno, yna ychwanegwch y menyn mewn lympiau bach.

4. Daliwch ymlaen i chwisgio nes ei fod yn edrych fel cwstard, dylai hyn gymryd rhyw 10-15 munud, fe fydd yn parhau i dewychu wrth oeri. Gofalwch eich bod yn cymysgu drwy’r amser, da chi ddim eisiau wyau wedi’i sgramblo.

5. Unwaith y bydd yn ddigon trwchus, trosglwyddwch i bot jam wedi’i sterileiddio (hynny yw wedi’i olchi yn y dishwasher, neu wedi’i olchi yn dda gyda dŵr a sebon, a’i sychu yn y popty ar dymheredd isel).

6. Rhowch gaead am ei ben a gadewch i oeri, cadwch yn yr oergell a defnyddiwch o fewn pythefnos.

Meringue

Cynhwysion

4 gwyn wy

150g siwgr mân

1 llwy fwrdd blawd corn

1 llwy fwrdd finegr gwyn

Dull

1. Cynheswch y popty i 120°C / 100°C ffan a leiniwch dun pobi gyda phapur gwrthsaim.

2. Chwisgiwch y gwyn wy gyda chwisg drydan nes ei fod yn ffurfio pigau meddal.

3. Ychwanegwch y siwgr, un llwy ar y tro, a pharhewch i chwisgio nes ei fod yn bigau stiff.

4. Ychwanegwch y blawd corn a’r finegr a’i gymysgu yn dda gyda’r chwisg.

5. Peipiwch y meringue ymlaen i’r papur gwrthsaim, neu defnyddiwch lwy.

6. Coginiwch am 2 awr ac wedyn troi’r popty i ffwrdd a’u gadael yno nes ei fod yn oer.

Gweinwch y meringues gyda hufen a ‘r ceuled lemon.

Dysgu gan y meistr yn Awstria

19 Ebr

20130419-172536.jpgGyda’r gaeaf yn edrych fel ei fod am bara am byth, a gwyliau’r Pasg yn agosáu fe benderfynais fynd ar drip munud olaf i Awstria. Wrth gwrs roedd yr eira ffres oedd yn dal i ddisgyn ar y llethrau yn atyniad mawr, ond roeddwn i hefyd yn awyddus i dreulio ychydig o amser yn y gegin gyda Heinz, fy nghyn fos, a phobwr o fri.

Fel dwi wedi sôn o’r blaen roeddwn i’n gweithio mewn gwesty bach yn Awstria am dymor sgïo ar ôl gadael y coleg, gwesty sy’n berchen i Heinz ac Anita Schenk. Mae Heinz yn dod o Awstria ond o Flaenau Ffestiniog y daw Anita yn wreiddiol. Fy gyfarfu’r ddau pan ddaeth Heinz i weithio fel chef yng ngwesty Portmeirion, ond ers blynyddoedd nawr maen nhw wedi bod yn rhedeg gwesty teuluol hyfryd o’r enw Luginsland, ynghanol ardal sgïo anhygoel.

heinz - blog

Mae Heinz yn chef gwych, ac roeddwn i’n lwcus i gael bwyta ei fwyd bob dydd am ryw bum mis wrth weithio yno. Ond er fy mod wrth fy modd ar y pryd yn ei wylio’n coginio ac o gael helpu yn y gegin, wnes i ddim bachu ar y cyfle i ddwyn rhai o’i ryseitiau. Felly y tro hwn roeddwn i wedi rhybuddio Heinz fy mod i’n dod i bigo ei ymennydd (gan mai dyna ble mae ei ryseitiau i gyd) yn ogystal â dod i sgïo.

Roedd o’n grêt cael mynd i sgïo bob dydd (tan i fi frifo fy hun yn troi fy mhen-glin, ond stori arall yw honno) ac wedyn dod ‘nôl i dreulio amser yn y gegin. Cegin anferth broffesiynol! Roedd yna rai ryseitiau yr oeddwn i’n awyddus i’w gael, ond hefyd roeddwn i’n agored i awgrymiadau Heinz.

bara - blog

Y rysáit oedd ar frig fy rhestr oedd y bara melys wedi’i blethu. Roedd yn Heinz yn arfer gwneud y dorth yma bob dydd ar gyfer brecwast ac mae hi’n hyfryd, yn enwedig efo’i jam bricyll cartref, neu jam grawnwin a sinsir. Mae’r dorth yn un reit gyfoethog gyda menyn, siwgr ac wyau ynddi, ond er ei fod yn felys, dyw hi ddim cweit fel torth brioche chwaith.

bara2 - blog

bara3 - blog

Fe ges i hwyl yn dysgu sut i blethu’r dorth, dwi’n gallu plethu gwallt efo tri darn yn hawdd ond fe gymerodd ychydig o amser i gael fy mhen rownd gweithio gyda phedwar. Mae Heinz yn gwneud torth fwy gyda 6 hefyd, ond dwi heb fentro honno … eto.

Dwi wedi gwneud fideo o’r plethu os da chi am drio fo eich hun.

Ymysg y pethau eraill y gwnes i goginio oedd gebacken mäuse – llygod wedi’i ffrio (math o doughnut efo cyrens)

llygod - blog

Beugel – toes bara tenau wedi’i lenwi un ai gyda chnau cyll wedi’i malu yn fan, neu hadau pabi (cynhwysyn sy’n gyffredin iawn yn Awstria).

beugel2 - blog

beugel - blog

beugel3 - blog

Mae’r Awstriaid yn coginio lot efo caws ceulaidd (curd cheese) hefyd, topfen maen nhw’n ei alw ond mae’n cael ei werthu fel Quark yn y wlad yma. Fe wnaethom ni ddau rysáit yn defnyddio’r caws yma – topfen knödel a topfen palatschinken.

Math o dumpling caws sy’n cael ei goginio mewn dŵr berwedig a’i orchuddio mewn briwsion bara, siwgr a sinamon yw topfen knödel. Mae’n flasus iawn, yn enwedig wedi’i weini gyda jam eirin.

IMG_7116

Wedyn crempog wedi’i llenwi gyda’r caws, cyrens a lemon, a’i goginio yn y popty wedi’i orchuddio mewn cwstard yw topfen palatschinken. Ddim yn annhebyg o gwbl i’n pwdin bara menyn ni a dweud y gwir, ond mae’r Awstriaid yn fwy na hapus i’w fwyta fel cinio yn ogystal â phwdin. Un o’r rhesymau pam fy mod i’n licio Awstria gymaint debyg!

paltschinken - blog

palatschinken2 - blog

Yn ogystal â hynny fe wnaethom ni fisgedi bach a creme caramel. Fel y gallwch ddychmygu roeddwn i wrth fy modd yn sglaffio’r holl bwdinau yma bob nos.

bisgedi - blog

creme caramel - blog

Mae’n rhaid i fi nawr ail greu’r holl ryseitiau yma adra, doedd Heinz ddim yn mesur dim, gan fod y ryseitiau i gyd yn ei gof, a’i fod yn gwybod o edrych faint o bopeth oedd angen. Felly roedd rhaid i mi amcangyfrif faint o bopeth yr oedd o’n ei ddefnyddio. Dwi’n gobeithio bod fy mesuriadau yn gywir!

Tartenni lemon meringue bach

11 Hyd

Ar hyn o bryd dwi’n teimlo fel fy mod i’n dechrau pob blog efo ymddiheuriad! Mae’r cyfnod rhwng pob un yn llawer rhy hir ar hyn o bryd. Ond mae’n rhaid cyfaddef dwi prin wedi bod yn pobi yn ddiweddar. Yn y ddau fis diwethaf dwi wedi gorffen y llyfr, symud yn ôl i Lundain, dechrau swydd newydd ac wedi treulio’r tair wythnos diwethaf yn mynd o un gynhadledd wleidyddol i’r llall. Felly dwi prin wedi cael amser i fi fy hun, heb sôn am amser i dreulio yn y gegin.

Ond y diwrnod o’r blaen fe gafodd Johny a fi ein gwahodd i fynd am swper gyda ffrindiau sy’n byw rownd y gornel, ac wrth gwrs fe wnes i gynnig gwneud pwdin. A dweud y gwir mae disgwyl cacen neu bwdin bob tro maen nhw’n fy ngweld i’r dyddiau. Dwi’n torri ffon i guro’n hun!

Ond beth i’w wneud oedd y cwestiwn, felly fe borais drwy fy llyfrau coginio yn chwilio am ysbrydoliaeth. Yn y diwedd fe benderfynais wneud rhyw fath o darten fach unigol i ni gyd, gan setlo ar rai lemon meringue yn y diwedd. Doeddwn i erioed wedi gwneud un o’r blaen, ond maen nhw’n ddigon hawdd mewn gwirionedd.

Cynhwysion

Ar gyfer y toes

330g o flawd plaen

200g o fenyn oer

75g o siwgr mân

1 wy

1 llwy fwrdd o ddŵr oer

Ar gyfer y llenwad

1 tun laeth cyddwys (pwy wyddai mai dyna di condensed milk yn Gymraeg?)

3 melynwy mawr

croen a sudd 3 lemon

3 gwyn wy

150g siwgr caster

Dull

Hidlwch y blawd i bowlen a thorrwch y menyn yn ddarnau bach, a’u rhwbio i mewn i’r blawd nes bod y gymysgedd yn edrych fel briwsion.

Yna ychwanegwch y siwgr a’i gymysgu â llwy cyn ychwanegu’r dŵr a’r wy a chymysgu gyda llaw nes bod y cyfan yn dod at ei gilydd i ffurfio pelen.

Tylinwch am ryw funud er mwyn sicrhau fod y toes yn llyfn, yna lapiwch ef mewn cling film a’i osod yn yr oergell am o leiaf 30 munud.

Ar ôl i’r toes oeri roliwch ef allan nes ei fod rhyw 4mm o drwch; torrwch gylchoedd i ffitio’ch tuniau. Dwi’n defnyddio tuniau tartenni bach unigol sy’n 10cm ar draws a gyda gwaelod rhydd.

Rhowch y toes yn y tuniau, (bydd y rysait yn gwneud digon ar gyfer 8) a gwasgu’n ofalus i’r ochrau. Torrwch unrhyw does sy’n weddill trwy rolio eich pin rholio ar draws dop y tun.

Rhowch y tuniau yn y rhewgell am 10 munud, yn y cyfamser cynheswch y popty i 180˚C/ Ffan 160˚C/ Nwy 4.

Rhowch ychydig o bapur gwrthsaim ar ben y toes a llenwi’r tuniau gyda phys ceramig a’u rhoi yn y popty am 15 munud. Yna tynnwch y papur gwrthsaim a’r pys a choginio’r toes am 5 munud arall.

I wneud y llenwad, rhowch y llaeth cyddwys mewn powlen, ychwanegwch y tri melynwy, croen lemon wedi’i gratio yn fân a’r sudd lemon, a’i gymysgu yn dda. Fe fydd yn mynd yn fwy trwchus yn naturiol.

Rhowch y 3 gwynnwy mewn powlen lân a’u chwisgio gyda chwisg drydan nes eu bod yn drwchus, ond ddim yn hollol stiff. Yna ychwanegwch y siwgr caster, lwy ar y tro, gan chwisgio yn llwyr bob tro. Ar ôl ychwanegu’r holl siwgr, parhewch i chwsigio nes ei fod yn drwchus ac yn sgleinio.

Llenwch y cesys gyda’r llenwad lemon. Yna rhowch y meringue mewn bag peipio, a’i beipio mewn blobs bach ar ben y llenwad lemon.

Rhowch yn ôl yn y popty am ryw 20 munud, nes bod y meringue yn dechrau brownio.

Rhowch ar rwyll fetel i oeri rhywfaint.

Gallwch eu bwyta yn gynnes neu yn oer.

Kaiserschmarrn – ymerawdwr y crempogau!

21 Chwe

Dwi wrth fy modd gyda chrempogau ond heblaw am ryw fore Sadwrn prin, anaml iawn dwi’n eu gwneud nhw. Ond bob dydd Mawrth Ynyd, dwi’n bwyta tomen enfawr ac addo fy mod i’n mynd i’w gwneud nhw’n fwy aml. Ond gesiwch be, dwi ddim!

A dim fi yw’r unig un, mae’r siopau yn llawn cynhwysion crempog (nai ddim dechrau pregethu am y crempogau na da chi’n eu cael mewn paced … Beth sydd yn haws na chymysgu llaeth blawd ac wyau?) yn yr wythnosau cyn dydd Mawrth Ynyd wedyn mae pawb yn anghofio am eu bodolaeth.

Ond pam? Mae yna gymaint y gallwch ei wneud â’r crempog syml, da chi mond angen mynd i creperie yn Ffrainc, neu i gael brecwast yn America i weld hynny. Ond, heb os nag oni bai, fy hoff bryd crempogaidd i yw Kaiserschamarrn. Dwn i’m faint ohonoch sydd wedi clywed am Kaiserschmarrn o’r blaen, heb son am ei fwyta, ond pwdin o Awstria ydio, ac mae o’r peth gorau y gallwch ei wneud gyda blawd, wyau a llaeth!

Ryw ddeng mlynedd yn ôl fe gefais i’r pleser o fyw yn Awstria, yn gweithio mewn gwesty dros y cyfnod sgïo, ac roeddwn i wrth fy modd gyda’r bwyd yno. Nawr dyw selsig a sauerkraut ddim y pethau mwyaf iach yn y byd, ond yn ystod y gaeaf does yna ddim byd gwell. Ond allan o’r holl fwyd kaiserschmarrn oedd fy ffefryn. Roeddwn i’n cael platied i ginio ar y mynydd o leiaf unwaith yr wythnos (peth gwych am Awstria, mae’n dderbyniol i gael pwdin fel cinio yno!).

Felly beth sydd mor arbennig am Kaiserchmarrn? Wel mae’r enw yn golygu llanast yr ymerawdwr, enw da! Ac mae o’n grempog melys, sy’n cael ei wneud trwy chwipio’r gwynnwy ar wahân, a’i blygu i mewn i’r cytew, fel eich bod chi’n creu rhyw fath o grempog souffle. Mae rhai llefydd yn ei goginio yn blaen , ond mae’n boblogaidd iawn gyda chyrens ynddo hefyd, a dyna’r un dwi’n ei hoffi.

Hanner ffordd trwy’r coginio mae’r crempog yn cael ei falu yn ddarnau. Yna mae’n cael ei weini gydag ychydig o siwgr eisin ar ei ben a phowlen o gompot ffrwythau. Mae’r compot ffrwythau fel arfer yn newid o un bwyty i’r llall, eirin sy’n draddodiadol ond dwi wedi cael compot afal neu fefus hefyd a hyd yn oed bowlen o eirin gwlanog tun! Heno fe ddefnyddiais i beth oedd gennyf yn y ty, sef mefus a llys duon bach (blueberry).

Dyma chi’r rysáit, a dwi’n addo does dim angen bod ar ben mynydd yn yr eira i fwynhau hwn, ond bysa fo’n neis!

Cynhwysion

5 wy
150g blawd plaen
250ml llaeth
2 llwy fwrdd siwgr
1 llwy de echdyniad fanila
Pinsied o halen
Rhesinau
Menyn i goginio

Dull

1. Cymysgwch y melynwy, blawd, siwgr, fanila, halen a llaeth nes bod gennych gytew tenau.

2. Chwisgiwch y gwynnwy nes ei fod yn stiff, a’i blygu yn ofalus i mewn i’r cytew gyda llwy fetel.

3. Toddwch y menyn mewn padell ffrio ac ychwanegwch y cytew. Gwasgarwch ychydig o resins am ei ben a’i ffrio ar dymheredd isel.

4. Trowch y crempog drosodd a’i adael i goginio am ryw funud, yna torrwch mewn i ddarnau bach gyda fforc, a’i ffrio nes ei fod wedi coginio yn llwyr.

5. Gweinwch gydag ychydig o siwgr eisin am ei ben a chompot ffrwythau ar yr ochr.

 

 

 

 

 

 

 

 

Baked Alaska

11 Chwe

Ddydd llun fe fyddai’n feirniad ar raglen Cog1nio, rhaglen debyg i junior masterchef. Fe fyddai’n gwneud masterclass efo’r plant ac wedyn yn beirniadu eu hymdrechion nhw.

Yr hyn fydd yn rhaid i’r plant ei goginio bydd baked Alaska. Bach o blast from the past ond rhywbeth fydd, gobeithio, yn herio’r plant.

Mae rhoi hufen ia mewn popty yn swnio yn hollol hurt, ond mae’r meringue yn gweithio fel ynysydd da. A gan mai dim ond am ychydig o funudau da chi’n rhoi’r pwdin yn y popty (jysd digon i setio’r meringue) dyw’r gwres ddim yn cyrraedd yr hufen ia.

Mae’n bosib gwneud un pwdin mawr ond fe wnes i rai bach unigol. Er doeddwn i dal methu gorffen un cyfan gan ei fod mor gyfoethog. Roedd o’n flasu iawn, mae’r meringue meddal un cyferbynnu yn hyfryd efo’r hufen ia oer, a’r sbwng ar y gwaelod yn rhoi ansawdd gwahanol. Ond wir maen nhw mor felys roeddwn i’n bownsio oddi ar y waliau! Felly os da chi isio sugar hit, triwch un o’r rhain.

 

Cynhwysion

Cacen sbwng (gwnewch un eich hun, neu prynwch un o’r siop)
Jam
Hufen ia (pa bynnag flas da chi eisiau)
3 gwyn wy
125g siwgr caster

 

Dull

1. Cynheswch y popty i 220C / 200C ffan.

 

2. Torrwch sleisen o’r gacen a thorri cylch allan (neu os da chi’n ddiog fel fi torrwch sgwâr, dio’n gwneud dim gwahaniaeth). Gosodwch y gacen ar hambwrdd pobi sydd wedi’i leinio gyda phapur gwrthsaim.

3. Taenwch ychydig o jam ar y gacen a gosod pelen o hufen ia am ei ben. Rhowch yn y rhewgell i’w gadw yn oer tan da chi wedi gwneud eich meringue.

4. Er mwyn gwneud y meringue gwahanwch y wyau a gosod y gwyn wy mewn bowlen fawr lân. Nawr mae’n bwysig bod y fowlen yn hollol lân heb unrhyw saim arni neu bydd y wyau ddim yn chwisgio yn iawn.

5. Chwisgwch y gwyn wy ar gyflymder isel i ddechrau, gan gynyddu’r cyflymder yn raddol. Unwaith da chi’n gallu gwneud copaon meddal gyda’r gwyn wy, gallwch ychwanegu’r siwgr. Gwnewch hyn un llwy fwrdd ar y tro, gam barhau i chwisgio nes bod eich wyau yn drwchus ac yn sgleiniog.

6. Nawr tynnwch eich sbwng a hufen ia o’r rhewgell a gorchuddiwch gyda’r meringue. Gwnewch yn siŵr nad oes yna unrhyw dyllau o gwbl, yn enwedig o gwmpas gwaelod y gwaelod.

7. Coginiwch yn y popty am ryw 4 munud, neu nes bod y meringue wedi dechrau brownio ar y tu allan. Gweinwch a bwytewch yn syth.

Hufen ia fanila ddefnyddiais i, ond defnyddiwch pa bynnag flas da chi’n licio. Hefyd os da chi’n licio siocled beth am roi cacen siocled neu brownie siocled ar y gwaelod a defnyddio hufen ia siocled. Hyfryd!

 

 

 

 

 

 

Dathlu’r ddaear gyda Bryn Williams

7 Chwe

Bob blwyddyn mae’r WWF (y bobl anifeiliad nid y reslars) yn gofyn i bobl ar draws y byd, i droi eu goleuadau i ffwrdd am awr er mwyn arbed trydan a hefyd i bwysleisio’r pryder ynglyn a newid hinsawdd.

Mae syniad yr  Awr Ddaear yn un syml iawn ond effeithiol, dwi’m yn meddwl ein bod ni’n sylwi cymaint o oleuadau da ni’n ei ddefnyddio tan mae popeth yn mynd yn dywyll am gyfnod. Felly am 8.30pm ar 31 Mawrth  maen nhw eisiau i bawb i droi eu goleuadau i ffwrdd am awr.

Ond mae eistedd o gwmpas yn y tywyllwch yn ddiflas, felly mae’r WWF yn annog pobl i ddefnyddio’r awr yna i gael pryd rhamantus dan olau cannwyll. Maen nhw hyd yn oed wedi perswadio nifer o gogyddion enwog i gynnig ryseitiau, gan gynnwys hoff gogydd pawb yng Nghymru ar hyn o bryd, Bryn Williams.

Dwi’n ffan mawr o fwyd Bryn Williams, ar ôl cael prydau anhygoel yn Odette’s, felly roeddwn i’n edrych ymlaen i weld ei fwydlen.

Fel pryd cyntaf mae ganddo rysáit ar gyfer cawl betys, sy’n edrych yn hyfryd. Macrell gyda broad beans a chorizo yw’r prif gwrs, rhywbeth fyddai’n sicr yn ceisio ei goginio yn y dyfodol. Ac i bwdin mae’n cynnig crymbl afal a chnau castan.

Fe fyddai’n sicr yn ceisio gwneud y ddau gwrs cyntaf yn y dyfodol ond am y tro, gan mai blog pobi ydi hwn, fe benderfynais wneud y crymbl.

Mae crymbl afal yn bwdin reit glasurol ond mae techneg Bryn o bobi’r crymbl ar wahân yn golygu eich bod chi’n cael crymbl sy’n hynod greisionllyd, sy’n cyferbynnu yn berffaith gyda’r afalau meddal. Mae’r almonau yn ychwanegu at yr ansawdd yna ac yn tostio’n hyfryd i roi blas ychwanegol i’r crymbl.

Mae’n rhaid cyfaddef nad ydw i’n or-hoff o flas nag ansawdd cnau castan, ac er eu bod nhw’n ychwanegu blas llawer mwy dwfn i’r crymbl, fe fuaswn i’n bersonol yn eu gadael allan y tro nesaf. Ond chwaeth bersonol yn unig yw hynny, ac fe fuaswn i’n annog unrhyw un i drio’r cnau yn y crymbl eu hunain.

Fe wnes i gwstard cartref i fynd gyda’r crymbl, oedd yn cyd-fynd yn berffaith, er fe fuasai hufen ia yn hyfryd hefyd. Un rhybudd am y ryaist yma, mae’n gwneud digon i deulu cyfan, felly os da chi’n bwriadu cael pryd rhamantus i ddau, hanerwch y cynhwysion.

Os da chi eisiau cenogi Awr Ddaear, gallwch gofrestru eich cefnogaeth fan hyn a gwnewch y mwyaf o’r awr yn y tywyllwch gyda phryd o fwyd hyfryd dan olau cannwyll (yn anffodus fydd Bryn Williams ddim yn dod draw i’w goginio i chi!).

Cynhwysion

12 afal, wedi eu plicio
1 pod fanila
125g siwgr caster
200g o gnau castan wedi’i goginio
1 llwy de o sbeis cymysg
25g menyn

Ar gyfer y crymbl

250g blawd plaen
200g siwgr caster
200g menyn, yn syth o’r oergell
150g o almonau wedi’i sleisio

Dull


1. Cynheswch y popty i 160C/140C fan/marc nwy 3.

2. Torrwch 3 o’r afalau mewn i sgwariau bach a’u gosod mewn sosban gyda’r pod fanila a’r siwgr. Gorchuddiwch gyda jyst digon o ddŵr a’u coginio nes eu bod nhw’n feddal. Dylai hyn gymryd rhyw 5 munud, ond cadwch olwg arnyn nhw. Yna stwnsiwch yr afalau gyda fforc a’u gosod i un ochr.

3. Torrwch weddill yr afalau a’r cnau castan mewn i ddarnau maint cegaid, a thaenwch y sbeis cymysg ar eu pen.

4. Cynheswch y menyn mewn padell ffrio a ffriwch yr afalau a chnau castan am ychydig o funudau.

5. Ychwanegwch at yr afalau wedi’i stwnsio yn y sosban. Trowch y gwres yn ôl ymlaen a choginiwch am 10 munud arall, neu nes bod yr afalau a’r cnau castan wedi coginio ac yn feddal.

6. Er mwyn gwneud y crymbl cymysgwch y blawd a’r siwgr mewn bowlen fawr. Ychwanegwch y menyn mewn darnau man a’i rwbio rhwng eich bysedd nes bod y gymysgedd yn edrych fel briwsion bras. Ychwanegwch yr almonau a’u cymysgu

7. Rhowch y crymbl ar hambwrdd pobi ai goginio yn y popty am ryw 10 munud, tan fod y gymysgedd yn euraidd frown. Fe fydd hyn yn sicrhau crymbl creisionllyd.

8. Rhowch y gymysgedd afal mewn bowlenni neu ramekins unigol (gwnewch yn siŵr eu bod nhw’n iawn i’w rhoi yn y popty). gorchuddiwch gyda’r crymbl a’u pobi yn y popty am 10 munud arall.

9. Gweinwch yn syth gyda digon o gwstard, hufen neu hufen ia.

 

Rum Baba

17 Ion

Tan yr wythnos hon doeddwn i erioed wedi clywed am rum baba o’r blaen. Gofynnodd fy ffrind i mi wneud rhai iddo, ond wrth gwrs doedd gennyf ddim clem beth oedd un, heb sôn am sut i’w gwneud nhw. Felly dyma ddechrau twrio trwy fy llyfrau coginio am rysait.

Fe lwyddais i ganfod tri rysait ar eu cyfer ymysg fy llyfrau, ond roedd y tri yn edrych yn hollol wahanol. Felly fe benderfynais i ddilyn rysait Dan Lepard yn bennaf, ond gan gymryd ychydig o syniadau o’r ryseitiau eraill

Rhyw fath o fara melys yw rum baba, sy’n dod yn yn wrieddiol o wlad Pwyl. Sydd, ar ôl ei goginio, yn cael ei socian mewn syryp melys o rym, fanila a lemon. Yn ôl y son (ok yn ôl wikipedia) mae’n ‘signature dish’ ym mwytai Alain Ducasse, un o chefs gorau’r byd. Felly os dio’n ddigon da iddo fo,  mae’n ddigon da i fi fyd!

Ar un pwynt doeddwn i’m yn ffyddiog y byddai’r rysait yn gweithio. Bu raid mi gymysgu’r toes a llaw gan nad yw’r kitchenaid gyda fi yng Nghaerdydd ar hyn o bryd. Doedd hynny ddim yn ddelfrydol gan ei fod yn gymysgedd gludiog iawn. Dwi eisiau eu trio eto ond gyda’r peiriant, dwi’n siwr y bydd o’n llawer haws ac yn creu lot llai o lanast. Y broblem arall gefais i oedd bod rhaid gadael i’r toes godi, fel bara. Ond gan ei bod hi mor oer ar hyn o bryd, fe gymerodd ddwywaith mor hir â’r disgwyl.

Gan nad oeddwn wedi bwyta na hyd yn oed gweld rum baba o’r blaen, doeddwn i ddim yn siwr sut yr oedden nhw fod i droi allan. Ond yn y diwedd fe gefais i fy siomi ar yr ochr orau, roedden nhw’n hyfryd. Mae yna flas tebyg iawn i frioche neu panattone ar y toes, ond maen nhw’n reit sych ar ben eu hunain. Dyna pam mae’r syryp rum yn hanfodol ac mae’n ychwanegu blas diddorol a chic i’r pwdin. Fe fyddai’n sicr yn eu gwneud nhw eto (ond dim ond os oes gennai’r kitchenaid!)

Cynhwysion

100ml llaeth cynnes
1½ llwy de o furum
150g blawd gwyn cryf
1 wy mawr a 1 melynwy
1½ llwy de o siwgr caster
½ llwy de o halen
50g menyn heb halen (ar dymheredd ystafell)
50g o resins

Ar gyfer y syryp
500g siwgr caster
500ml dwr
stribedi o groen lemwn
rym tywyll

Dull

1. Cynheswch fowlen gydag ychydig o ddŵr berw, a’i sychu yn llwyr. Yna ychwanegwch hanner y llaeth cynnes, burum a dwy lwy fwrdd o’r blawd. Cymysgwch a gadewch i sefyll am 15 munud, nes eich bod yn gweld swigod.

2. Tra’ch bod chi’n gwneud hyn sociwch y rhesins mewn ychydig o’r rym tywyll.

3. Yna ychwanegwch weddill y llaeth,  blawd, wy, melynwy, siwgr a halen a’i gymysgu gyda pheiriant cymysgu am 2 funud. Os nad oes gennych chi beiriant cymysgu, fe fydd raid i chi ei dylino efo’ch dwylo. Gan fod y gymysgedd yn un reit wlyb, mae angen slapio’r toes o gwmpas y fowlen yn hytrach na thylino mewn modd cyffredin. Byddwch yn barod am lanast os da chi’n gwneud hyn!

4. Nesaf mae angen ychwanegu’r menyn a’i guro (neu dylino) eto am ddau funud arall, cyn cyhwanegu’r rhesin ar ôl eu tynnu o’r rym.

5. Gorchuddiwch a’i adael mewn lle cynnes am 45 munud neu tan mae wedi dyblu mewn maint. Fe gymerodd llawer hirach na 45 munud i fi, felly mae’n werth dyfalbarhau os nag yw wedi codi rhyw lawer ar ôl 45 munud.

6. Ar ôl i’r gymysgedd godi Irwch dun myffin dwfn gyda menyn a’u hanner llenwi gyda’r cytew (dylai’r rysait wneud rhyw 5-6). Gadewch i godi unwaith eto, nes bod y cytew yn llenwi’r tun.

7. Cynheswch y popty i 200C / 180C fan a’u pobi am 25 munud.

8. Ar ôl eu coginio mae’n bosib eu gweinio yn syth neu eu cadw am ychydig o ddiwrnodau (mewn bocs gyda chaead) cyn eu socian yn y syryp.

9. Pan da chi’n barod i’w gweinio, cynheswch y siwgr, dwr, croen lemwn, fanila a sloch go dda o rym (at eich blas chi, ond mae modd ei dynnu allan os yw plant am ei fwyta).

10. Yna rhowch y babas yn y syryp a’u gadael i socian am ychydig o funudau, gan sicrhau eich bod chi’n eu troi drosodd.

11. Yna gweinwch gydag ychydig o’r syryp ar eu pen ac ychydig o hufen chwisg (neu hufen ia os da chi ddim yn licio hufen fel fi!)

Dilyn

Derbyn pob cofnod newydd yn syth i'ch Blwch Derbyn