Kaiserschmarrn – ymerawdwr y crempogau!

21 Chw

Dwi wrth fy modd gyda chrempogau ond heblaw am ryw fore Sadwrn prin, anaml iawn dwi’n eu gwneud nhw. Ond bob dydd Mawrth Ynyd, dwi’n bwyta tomen enfawr ac addo fy mod i’n mynd i’w gwneud nhw’n fwy aml. Ond gesiwch be, dwi ddim!

A dim fi yw’r unig un, mae’r siopau yn llawn cynhwysion crempog (nai ddim dechrau pregethu am y crempogau na da chi’n eu cael mewn paced … Beth sydd yn haws na chymysgu llaeth blawd ac wyau?) yn yr wythnosau cyn dydd Mawrth Ynyd wedyn mae pawb yn anghofio am eu bodolaeth.

Ond pam? Mae yna gymaint y gallwch ei wneud â’r crempog syml, da chi mond angen mynd i creperie yn Ffrainc, neu i gael brecwast yn America i weld hynny. Ond, heb os nag oni bai, fy hoff bryd crempogaidd i yw Kaiserschamarrn. Dwn i’m faint ohonoch sydd wedi clywed am Kaiserschmarrn o’r blaen, heb son am ei fwyta, ond pwdin o Awstria ydio, ac mae o’r peth gorau y gallwch ei wneud gyda blawd, wyau a llaeth!

Ryw ddeng mlynedd yn ôl fe gefais i’r pleser o fyw yn Awstria, yn gweithio mewn gwesty dros y cyfnod sgïo, ac roeddwn i wrth fy modd gyda’r bwyd yno. Nawr dyw selsig a sauerkraut ddim y pethau mwyaf iach yn y byd, ond yn ystod y gaeaf does yna ddim byd gwell. Ond allan o’r holl fwyd kaiserschmarrn oedd fy ffefryn. Roeddwn i’n cael platied i ginio ar y mynydd o leiaf unwaith yr wythnos (peth gwych am Awstria, mae’n dderbyniol i gael pwdin fel cinio yno!).

Felly beth sydd mor arbennig am Kaiserchmarrn? Wel mae’r enw yn golygu llanast yr ymerawdwr, enw da! Ac mae o’n grempog melys, sy’n cael ei wneud trwy chwipio’r gwynnwy ar wahân, a’i blygu i mewn i’r cytew, fel eich bod chi’n creu rhyw fath o grempog souffle. Mae rhai llefydd yn ei goginio yn blaen , ond mae’n boblogaidd iawn gyda chyrens ynddo hefyd, a dyna’r un dwi’n ei hoffi.

Hanner ffordd trwy’r coginio mae’r crempog yn cael ei falu yn ddarnau. Yna mae’n cael ei weini gydag ychydig o siwgr eisin ar ei ben a phowlen o gompot ffrwythau. Mae’r compot ffrwythau fel arfer yn newid o un bwyty i’r llall, eirin sy’n draddodiadol ond dwi wedi cael compot afal neu fefus hefyd a hyd yn oed bowlen o eirin gwlanog tun! Heno fe ddefnyddiais i beth oedd gennyf yn y ty, sef mefus a llys duon bach (blueberry).

Dyma chi’r rysáit, a dwi’n addo does dim angen bod ar ben mynydd yn yr eira i fwynhau hwn, ond bysa fo’n neis!

Cynhwysion

5 wy
150g blawd plaen
250ml llaeth
2 llwy fwrdd siwgr
1 llwy de echdyniad fanila
Pinsied o halen
Rhesinau
Menyn i goginio

Dull

1. Cymysgwch y melynwy, blawd, siwgr, fanila, halen a llaeth nes bod gennych gytew tenau.

2. Chwisgiwch y gwynnwy nes ei fod yn stiff, a’i blygu yn ofalus i mewn i’r cytew gyda llwy fetel.

3. Toddwch y menyn mewn padell ffrio ac ychwanegwch y cytew. Gwasgarwch ychydig o resins am ei ben a’i ffrio ar dymheredd isel.

4. Trowch y crempog drosodd a’i adael i goginio am ryw funud, yna torrwch mewn i ddarnau bach gyda fforc, a’i ffrio nes ei fod wedi coginio yn llwyr.

5. Gweinwch gydag ychydig o siwgr eisin am ei ben a chompot ffrwythau ar yr ochr.

 

 

 

 

 

 

 

 

10 Ymateb to “Kaiserschmarrn – ymerawdwr y crempogau!”

  1. Rhodri 22/02/2012 at 11:40 #

    Ma’r enw na’n briliant chwara teg. “Schmarrn” yn onomatopaeic fyd yndi.

    Nesh i grempogau figan neithiwr efo llaeth reis a egg substitute. Mi weithiodd yn weddol dda. Dal at ei gilydd yn iawn, ag oedd Pwyll wrth ei fodd yn sglaffio nhw. Yn wahanol i rai o’r crempoga o’n i’n gael gen mam bac in ddy dei! Oeddan nhw dal yn blasu’n dda cofia.

    • Paned a Chacen 22/02/2012 at 12:47 #

      O bechod, odd dy grempoga di gan mam wastad yn bach o disaster yn doedden. Falch bo chi di cael bach mwy o lwyddiant ar gyfer Pwyll.

      Y Kaiserschmarrn di mynd lawr yn dda iawn yn y Glyn-Jones household – crempog campus!

  2. cathasturias 23/02/2012 at 17:17 #

    Reit, mynd i drio rhain nesaf! Rhai plaen wnes i eleni ond mae’r rhain yn dod â dŵr i’m ceg dim ond darllen y rysait! Diolch am fy nilyn gyda llaw ond byddai’n well iti ddilyn fy mlog Asturiasyngymraeg.wordpress.com achos fydda’i byth yn sgrifennu dim yn y llall

    • Paned a Chacen 23/02/2012 at 21:37 #

      Maen nhw’n hyfryd, gad fi wybod sut wyt ti’n dod mlaen. Dyna’r blog o’n i’n meddwl o’n i’n ei ddilyn. Ond yn amlwg ddim . Dwi’n dilynyr unig cywir rwan!

  3. lowrihafcooke 07/03/2012 at 11:08 #

    Ma hwn yn edrych yn fendigedig Elliw. Dwi a fy chwiorydd di bod yn mynd i sgio yn Awstria ers rhai blynyddoedd (ond ddim eleni yn anffodus), ac un o’r prif resymau am hynny ydy’r bwyd; y Winener Schnitzel, Apfel Strudel ac ati, ond dwi erioed wedi profi hwn. Edrych mlaen yn fawr i ddilyn y rhysait!

    • Paned a Chacen 07/03/2012 at 12:30 #

      O ia tria fo, mae o’r peth gorau am Awstria. Ond ti di codi blas arnai am wiener schnitzel rwan, efo kartoffel salat, mmmm!

Trackbacks/Pingbacks

  1. Diwrnod Crempog « Paned a Chacen - 12/02/2013

    […] i ni heddiw, neu grempogau tew Americanaidd i frecwast gyda bacwn a sudd masarn, neu hyd yn oed y Kaiserschmarrn o Awstria, sy’n gwneud pwdin neu hyd yn oed ginio […]

  2. Topfenpalatschinken – crempogau wedi’i pobi | Paned a Chacen - 04/03/2014

    […] yn bwyta crempogau drwy gydol y flwyddyn, boed o’n bwdin (dwi di blogio am fy hoffter o Kaiserschmarrn o’r blaen) ond hefyd i ginio – mae nhw’n gwneud cawl clir hyfryd, gyda stribedi o […]

  3. Llond bol o grempog | Paned a Chacen - 16/02/2015

    […] Dwi di blogio o’r blaen am fy hoff bwdinau crempog o Awstria, felly beth am drio Kaiserchmarrn – ymewrawdwr y crempogau. Pwdin swmpus sy’n groes rhwng crempog a soufflé ac […]

  4. Crempogau tatws melys | Paned a Chacen - 09/02/2016

    […] nifer o ryseitiau crempog gwahanol ar y blog, o grempog gyffredin, i ymerawdwr y crempogau- y kaiserschmarrn, a hyd yn oed rhai fegan. Ac ar ddydd Mawrth Ynyd mae gen i un arall i chi – crempogau tatws […]

Gadael Ymateb

Rhowch eich manylion isod neu cliciwch ar eicon i fewngofnodi:

WordPress.com Logo

You are commenting using your WordPress.com account. Log Out / Newid )

Twitter picture

You are commenting using your Twitter account. Log Out / Newid )

Facebook photo

You are commenting using your Facebook account. Log Out / Newid )

Google+ photo

You are commenting using your Google+ account. Log Out / Newid )

Connecting to %s

%d bloggers like this: