Hidlo neu beidio dyna yw’r cwestiwn

9 Mai

hidlo

Dwi’n mynd i ddweud rhywbeth dadleuol iawn fan hyn, rhywbeth sy’n siŵr o olygu gwaharddiad am oes o Ferched y Wawr a gwneud i Mary Berry dagu ar ei sgons – dwi wedi stopio hidlo blawd!

Diogi oedd o i ddechrau, pam treulio dau funud yn hidlo, ac ychwanegu at y golchi llestri, pan allai daflu’r blawd i mewn a symud yn syth i’r cam nesaf? Ond yn ddigon buan fe sylwais nad oedd o’n gwneud y gwahaniaeth lleiaf i fy nghacennau. Doeddwn nhw ddim yn drwm nac yn llawn lympiau, felly fe stopiais hidlo yn llwyr.

Dwi’n teimlo fel fy mod i’n cyfaddef i ryw bechod ofnadwy fan hyn, ond dwi jyst ddim yn gweld y pwynt mwyach. Felly’r unig bryd mae’r rhidyll yn gweld golau dydd nawr yw pan fyddai’n straenio llysiau neu basta.

Ond pam felly bod pob un rysáit (gan gynnwys y rhai yn fy llyfrau i mae’n rhaid cyfaddef) yn pwysleisio’r angen i hidlo blawd?

Wel yn hanesyddol mae yna lawer o resymau i hidlo blawd.

– Mae hidlo yn ffordd o ysgafnhau blawd sydd wedi ei bacio yn dynn y wrth iddo gael ei storio a’i gludo.

– Mae’n cael gwared â lympiau.

– Ac yn cael gwared ag unrhyw ddarnau o wenith neu hyd yn oed pryfaid sydd ar ôl yn y blawd.

– Mae’n cymysgu cynhwysion at ei gilydd.

Ond erbyn hyn dwi’n meddwl mai arfer ydio erbyn hyn gan nad yw’r rhesymau uchod yn berthnasol gyda chynhwysion modern. Da chi’n annhebyg iawn o gael darnau o wenith neu hen bryfed yn eich blawd y dyddiau hyn, ac os yw eich blawd yn lympiog iawn yna mae yna rywbeth yn bod a thaflwch o i ffwrdd. Os yw eich blawd wedi ei bacio yn dynn yn y bag, yna dylai’r broses syml o dywallt eich blawd i mewn i’ch powlen wrth ei bwyso fod yn ddigon i’w ysgafnhau. Ac os ydych eisiau cymysgu eich blawd gyda phowdr codi neu bowdr coco, yna rhowch nhw mewn powlen a’u cymysgu gyda fforc.

DS2_9270

DS2_9272

Mae llawer yn dadlau hefyd bod hidlo eich blawd yn ychwanegu mwy o aer i’r gymysgedd ac yn golygu bod y cynhwysion yn cyfuno yn llawer gwell ac yn gwneud eich cacennau yn ysgafnach. Yn bersonol dwi’n gweld dim prawf o hynny, a dyw fy nghacennau yn sicr ddim yn drymach ers i mi stopio hidlo.

Ond mae yna un peth sy’n sicr o wneud gwahaniaeth mawr i ba mor ysgafn yw eich cacennau, a’r amser yr ydych chi’n ei dreulio yn curo eich menyn a siwgr yw hynny. Pan fydd rysáit yn galw arnoch i guro’r menyn a’r siwgr nes ei fod yn ysgafn, dyw o ddim yn ddigon i’w guro am funud neu ddwy , mae angen parhau i guro am 4-5 munud, nes eich bod yn gallu gweld y gymysgedd yn newid lliw fel ei fod bron yn wyn. Fe sylwch ei fod yn llawer mwy ysgafn hefyd – a’r rheswm am hynny yw ei fod yn llawn swigod aer. Dyna sut mae cael aer yn eich cacen nid drwy hidlo ychydig o flawd.

kitchenaid

 

DS2_9258

Wir i chi allai ddim a phwysleisio pa mor bwysig yw hi i guro eich siwgr a menyn yn ddigon hir, dwi’n efengylaidd am hyn. Dwi’n hen ddigon parod i dorri corneli ac arbed amser ble gallaf i, ond dyw hwn byth yn gam y byddaf yn ei osgoi.

Felly be da chi’n ei feddwl o fy nghyfaddefiad? Ydych chi’n gweld gwerth mewn hidlo neu yn ei wneud allan o arfer yn unig? Dwi’n siŵr y bydd yna lawer sy’n anghytuno a mi ond dwi’n annhebyg iawn o estyn am fy rhidyll eto yn y dyfodol agos.

2 Ymateb to “Hidlo neu beidio dyna yw’r cwestiwn”

  1. Dafydd Morse 09/05/2014 at 14:47 #

    Rhaid imi ddweud dwi ddim yn un am hidlo yn gyffredinol. Ma na ddau peth sy’n gwneud fi’n fodlon estyn am ridyll ar wahan i siwgr eisin: Sgons a sbwng Fictoria. Dwi hyn yn oed yn hidlo ddwywaith ar ôl penawd o Neighbours un tro! Wel am y golchi lan… taro’r rhidyll ar y cownter a’i roi yn ôl yn y cwpwrdd fyddai i’n gwneud! Nawr fi’n sy’n cyfaddef pechod mawr!

    • Paned a Chacen 10/05/2014 at 10:13 #

      Dwi ddim hyd yn eod yn hidlo ar gyfer sbwng fictoria, ond dwi newydd sylwi mae yna un peth rysait ble dwi hyd yn ied yn estyn am y rhidyll a macarons di rheina, ond fel arfer geith o aros yn y cwpwrdd!Ond licio’r dechneg i lanhau’r rhidyll.

Gadael Ymateb

Rhowch eich manylion isod neu cliciwch ar eicon i fewngofnodi:

WordPress.com Logo

You are commenting using your WordPress.com account. Log Out / Newid )

Twitter picture

You are commenting using your Twitter account. Log Out / Newid )

Facebook photo

You are commenting using your Facebook account. Log Out / Newid )

Google+ photo

You are commenting using your Google+ account. Log Out / Newid )

Connecting to %s

%d bloggers like this: