Tegan Newydd

Sori os ydw i’n swnio fel rhyw dôn gron ynglŷn â bwyta’n iach y dyddiau hyn (dwi’n addo blog am gacen go iawn yn fuan) ond roedd rhaid i mi flogio am fy nhegan newydd – y nutribullet. Yn ôl y cwmni nid ‘juicer’ na ‘blender’ mo hwn ond ‘superfood nutrition extractor’ – sydd wrth gwrs yn swnio fel nonsens llwyr. Ond anghofiwch am beth mae’r cwmni yn ei ddweud, yr hyn ydi o yw blender hynod o gryf, sy’n gwneud smoothies perffaith mewn munud. Gallwch hyd yn oed ychwanegu cnau, llysiau caled, neu afalau gyda’u croen ac fe fyddwch chi’n dal i gael diod lyfn.

Nawr mae’n rhaid cyfaddef fy mod i yn y gorffennol wedi bod yn ddigon parod i wneud hwyl am ben pobl oedd yn yfed eu llysiau, ond ers prynu hwn, mae’n ddrwg gen i ddweud fy mod i nawr yn un o’r bobl hynny . A dweud y gwir mae smoothie gwyrdd yn reit flasus. Efallai bod diod wedi’i wneud gyda sbigoglys neu kale yn edrych fel chwd kermit y frog, ond o’u cymysgu gyda ffrwythau fyddwch chi ddim yn eu blasu, er wrth gwrs rydych chi’n dal i gael y maeth.

 

 

Dwi wedi bod yn yfed un o’r rhain i frecwast bob dydd ers pythefnos ac wedi gwneud pob math o gyfuniadau gwahanol.

• sbigoglys, ciwcymbr, mafon a mango
• sbigoglys, afocado, nectarin, grawnwin, lemon a flaxseed
• letys, afocado, banana, mango a chnau cashew
• sbigoglys, brocoli, ciwcymbyr, melon, mango a sinsir

Yn syml dwi’n taflu pa bynnag lysiau a ffrwythau sydd gen i yn y potyn a’u cymysgu i fyny gydag ychydig o ddŵr neu laeth reis, gan ychwanegu ychydig o hadau chia neu flax a dyna ni, diod blasus sy’n eich llenwi ac sy’n dda i chi hefyd. Dwi’n siŵr nad ydi o i bawb, ond dwi wrth fy modd gyda fy nhegan newydd  – ac mae unrhywbeth sy’n fy annog i fwyta mwyaf o lysiau a ffrwythau yn dda yn fy marn i.

 

 

Crempogau banana di-glwten

Dwi’n amlwg ar dipyn bach o ‘health kick’ ar hyn o bryd, achos dyma i chi rysáit iachus arall.

Fel yr oeddwn i’n dweud yn fy nghofnod diwethaf ar bwdin chia, dwi’n licio meddwl fy mod i’n bwyta’n weddol iach y rhan fwyaf o’r amser. Ond pan fo’r tywydd yn braf, fel mae hi wedi bod yn ddiweddar, dwi’n naturiol yn tueddu i fwyta salad a ffrwythau yn hytrach na rhywbeth trymach.

Wedi dweud hynny dwi wedi priodi yn ddiweddar a dwi’n mynd ar fy mis Mel ymhen mis, felly mae hynny wedi rhoi rheswm ychwanegol i mi chwilio am opsiynau sy’n is mewn braster a siwgr.

A dyma i chi grempogau sydd nid yn unig yn blasu’n hyfryd ac yn hawdd iawn i’w gwneud ond hefyd sydd heb unrhyw siwgr na glwten ynddyn nhw, ac yn isel mewn calorïau. A dweud y gwir yr oll sydd ynddyn nhw yw banana ac wy, gydag ychydig bach o bowdr codi a sinamon.

 

Nawr mae’n amhosib credu y gall bananas ac wyau wneud crempog call, ond wir i chi drwy ryw ryfedd wyrth mae’n gweithio. Wrth gwrs dy nhw ddim cystal â chrempog arferol, ond maen nhw’n flasus. Ac yn berffaith os ydych chi’n gwylio’ch pwysau neu jyst eisiau brecwast sydd ychydig yn fwy iach. A gyda’r wyau a banana maen nhw’n fwyd perffaith i’w fwyta os ydych wedi bod yn gweithio’n galed yn y gym.

 

Cynhwysion
1 banana mawr
2 wy
¼ llwy de o bowdr codi
½ llwy de o sinamon

Dull
1. Stwnsiwch y banana mewn powlen nes ei fod yn weddol lyfn, ond gydag ychydig o lympiau.
2. Ychwanegwch yr wyau a’u cymysgu yn dda cyn ychwanegu’r powdr codi a sinamon, a’u cymysgu eto.
3. Yna fel gyda chrempogau bach arferol, rhowch lond llwy mewn padell gynnes i goginio. Dwi’n tueddu i wneud rhyw 4 ar y tro.
4. Ar ôl munud neu ddwy trowch nhw drosodd a’u coginio am funud neu ddwy ymhellach.
5. Bwytewch gyda ffrwythau ffres ac ychydig bach o surop masarn.

Cacen almon a cheirios ffres

Mae’r haul wedi bod yn tywynnu ers wythnosau a’r haf wedi cyrraedd ac mae hynny yn golygu bod yna geirios ffres yn y siopau (neu os ydych chi’n lwcus iawn, ar eich coeden). Mae tymor ceirios ffres yn un byr iawn, felly dwi wastad yn trio gwneud y mwyaf o’r cyfnod yma.

Mae gen i atgofion melys iawn o fwyta bagiad cyfan o geirios fel plentyn, hyd nes bod gen i fynydd o gerrig ar ôl. Nawr os ydych chi’n gallu osgoi eu bwyta nhw i gyd yn syth, mae’r gacen hon yn ffordd hyfryd o ddathlu hyfrydwch ceirios ffres.

Wrth gwrs os nad ydych chi’n gallu cael gafael ar geirios ffres yna ddefnyddio ceirios glacee yn lle, ond cofiwch eu golchi i ddechrau fel nad ydyn nhw’n or-felys.

Cynhwysion

300g o geirios (cyn tynnu’r cerrig)
125g o fenyn heb halen
150g o siwgr mân
2 wy
½ llwy de o rin almon
150g o flawd plaen
1½ llwy de o bowdr codi
100g o almonau mâl
20g o almonau tafellog

 

Dull

Cynheswch eich popty i 180C / 160C ffan / Nwy ac irwch a lein irwch waelod tun crwn 20cm sy’n cau gyda sbring (springform tin)

Torrwch y cerrig allan o’r ceirios. Mae’n bosib cael teclyn pwrpasol i wneud hyn sy’n gadael y ceirios yn gyfan , ond dwi’n eu torri’n hanner gyda chyllell finiog.

Yna gyda chwisg drydan, cymysgwch y menyn a’r siwgr am 5 munud nes eu bod yn olau ac yn ysgafn.

Ychwanegwch yr wyau, un ar y tro, gan sicrhau eich bod chi’n chwisgio’n drylwyr cyn ychwanegu’r ail wy.

Ychwanegwch y rhin almon a’i gymysgu yn dda, cyn ychwanegu’r blawd, powdr codi a’r almonau mâl a’u plygu i mewn i’r gymysgedd gyda llwy neu spatula.

Rhowch ryw 50g o’r ceirios i un ochr, a chymysgwch y gweddill i mewn i gymysgedd y gacen.

Trosglwyddwch y gymysgedd i’ch tun, a’i goginio am 30 munud. Wedi hanner awr tynnwch allan o’r popty ac ysgeintiwch yr almonau tafellog am ei ben, a Rhowch y ceirios sydd gennych yn weddill yn bentwr ar ganol y gacen. Rhowch yn ôl yn y popty i goginio am 10 munud arall, neu hyd nes bod sgiwer, o’i osod yng nghanol y gacen, yn dod allan yn lân.

Gadewch i oeri yn y tun, ysgeintiwch gydag ychydig o siwgr eisin cyn ei weini.